41 anos de tradición lúdica e gastronómica na Baixa Limia. Así definiu hoxe o presidente da Deputación de Ourense, Manuel Baltar, a “Festa do Peixe” de Bande, unha das celebracións gastronómicas máis antigas de Galicia, que hoxe foi presentada no Centro Cultural da Deputación, coa presenza do alcalde de Bande, José Antonio Armada, e dos organizadores do evento.
Como cada ano, nesta edición de 2012 prevese que miles de persoas, cunha sinalada presenza de visitantes de Portugal, se acheguen a Bande os días 1, 2 e 3 de xuño para disfrutar desta singular festa que ten no peixe o seu atractivo principal, converténdose nunha das celebracións de gastronomía fluvial máis importantes de España.
José Antonio Armada dixo que gastronomía, tradición e ocio “van da man nesta festa, que logo de máis de catro décadas coloca a Bande como referencia dunha cociña natural, que exalta por riba de todo o peixe, pero tamén o pan, os doces e os pratos típicos de Bande e da Baixa Limia.
Ademais do campionato de pesca, dos obradoiros medioambientais e das degustacións gastronómicas, a festa ten como novidade deste ano a celebración dun mercado de artesanía, antigüidades e rastro, do que hoxe, na rolda de prensa, os organizadores amosaron unha mostra: o mini-gramófono construído hai 100 anos, unha peza única de coleccionista.