Manuel Baltar pide aos empresarios portugueses que impulsen “a cooperación público-privada con Ourense para ser máis fortes en Europa�

• Na sede da Asociación Empresarial de Portugal, en Porto, onde Manuel Baltar foi convidado a un encontro económico, o presidente provincial reclamou potenciar "o traballo en rede nun mundo cada vez máis competitivo, pero no que temos que manter a nosa identidade, a historia que nos une, os lazos culturais e lingüísticos e, por suposto, as relacións económicas entre dous territorios que tamén comparten a fronteira máis extensa entre España e Portugal"

• Como presidente da Asociación Europea de Gobernos Provinciais Intermedios, Partenalia, invitou aos empresarios a promover a participación de socios portugueses neste foro "facilitando así o acceso directo ás institucións de goberno comunitarias potenciando a participación en proxectos europeos"

Porto, 22 de setembro de 2021.- O presidente da Deputación de Ourense, Manuel Baltar, pediu hoxe en Porto aos empresarios portugueses que impulsen "a cooperación público-privada con Ourense para ser máis fortes en Europa, potenciado o traballo en rede nun mundo cada vez máis competitivo, pero no que temos que manter a nosa identidade, a historia que nos une, os lazos culturais e lingüísticos e, por suposto, as relacións económicas entre dous territorios que tamén comparten a fronteira máis extensa entre España e Portugal".

Na sede da Asociación Empresarial de Portugal, onde Manuel Baltar foi convidado a un encontro económico no que tamén interviñeron o presidente e administrador da asociación, Luís Miguel Ribeiro e Paulo Vaz, e o presidente da Rede Mundo Atlántico, Mariano Gómez-Ulla, o presidente provincial detallou o papel que está a xogar a Deputación de Ourense "como a institución que posúe a máis ampla perspectiva da provincia, pero que tamén posiciona o territorio en Europa liderando varias entidades".

Neste contexto e como presidente da Asociación Europea de Gobernos Provinciais Intermedios, Partenalia, invitou aos empresarios a promover a participación de socios portugueses neste foro "aberto agora tamén a países que non teñan provincias -como o caso de Portugal- e facilitar así o acceso directo ás institucións de goberno comunitarias potenciando a participación en proxectos europeos", lembrando neste punto a gran experiencia da Deputación no desenvolvemento de programas comunitarios con socios lusos. Unha relación, engadiu, onde destaca "unha das áreas transfronteirizas máis integradas de Europa, a eurocidade Chaves-Verín, cunha actividade conxunta cultural, de servizos e económica de relevancia".

"Temos que estar preparados para o que vai vir, non para o que temos agora", advertiu Manuel Baltar ao falar da incertidume que rodea á distribución dos fondos Next Generation, "pero sobre todo ante o novo marco financeiro plurianual da Unión Europea 2021-2027, onde temos que loitar por ofrecer os mesmos servizos e calidade de vida ao 20 % dos habitantes que residen no 80 % do territorio comunitario, e no só destinando recursos para as zonas máis poboadas a través de criterios que non teñan ni orde nin rigor".

O presidente reclamou "potenciar este traballo en rede mediante unha sólida cooperación, labor que se chama anticipación e planificación", explicando que estas son as liñas que aplica o goberno provincial de Ourense "para poder aprobar, o próximo venres, os orzamentos para 20202, ou para ser a primeira Deputación de España en presentar unha estratexia de captación de fondos europeos con 16 proxectos tractores para a provincia".

Esta planificación, sinalou, "tamén a estamos a aplicar noutros ámbitos, preparándonos por exemplo para a chegada do AVE, como porta de entrada da alta velocidade a Galicia, que axudará a aumentar a competitividade do noso territorio e a promoción dos seus recursos como a gastronomía, a etnografía, os parques naturais, o patrimonio arquitectónico ou a cultura".

Proba das vantaxes que ofrece a cooperación, dixo, "é a oportunidade que ten Portugal de beneficiarse deste enorme salto cualitativo nas comunicacións, pois compartimos unha singularidade que non ten ningún outro territorio en Europa: o potencial termal, que en momentos de pandemia e pospandemia, onde todos temos claro que o ben máis prezado é a saúde, vai ter un protagonismo indiscutible". Ourense, con 15 vilas termais, 9 balnearios e un gran hotel balneario na capital para 2027 que estará situado no Pazo Provincial "vaise posicionar nun lugar preferente neste importantisímo sector de negocio, de novo cunha estratexia de anticipación que xa iniciamos participando na Asociación Europea de Cidades Históricas Termais, primeiro como socios e agora desde a presidencia".

Manuel Baltar: “O Ourense Film Festival é unha homenaxe a todos os que fixeron da cidade e da provincia unha terra de cine�

• Na presentación certame audiovisual, o presidente da Deputación afirmou que o rigor e calidade do OUFF "reflíctese nestes 26 anos, edicións máis que suficientes para mirar con moito optimismo cara o futuro, comprobando como Ourense gañou visibilidade organizativa en todo este tempo", converténdose "nun espello da cultura que tan fundamental é para esta Deputación, como así quedará demostrado na inauguración e na clausura, coa proxección de senllas producións rodadas en Ourense"

• Anunciou que engadirá ás funcións da deputada de Cultura, Patricia Torres, a responsabilidade de produción audiovisual, "título que non existe na nosa contorna nacional e que reflicte perfectamente o carácter da provincia como porta de entrada do cinema de Galicia"

Ourense, 21 de setembro de 2021.- O Centro Cultural Marcos Valcárcel acolleu hoxe a presentación da 26 edición do Ourense Film Festival, "que representa unha homenaxe a todos aqueles que fixeron desta cidade e desta provincia unha terra de cine, berce da cultura, da reflexión, da innovación e da vangarda", dixo o presidente da Deputación de Ourense, Manuel Baltar, nun acto no que anunciou que engadirá ás funcións da deputada de Cultura, Patricia Torres, a responsabilidade de produción audiovisual, "título que non existe na nosa contorna nacional e que reflicte perfectamente o carácter de Ourense como porta de entrada do cinema de Galicia".

O rigor e calidade do festival, dixo, "reflíctese nestes 26 anos, edicións máis que suficientes para mirar con moito optimismo cara o futuro, comprobando como Ourense gañou visibilidade organizativa en todo este tempo e como se nos coñece en San Sebastián, en Almería, Alacante ou Málaga, onde os presidentes dos seus respectivos gobernos provinciais tamén apostan con decisión polos seus certames". O festival, engadiu Manuel Baltar, "achega a Ourense unha personalidade propia, un espello da cultura que tan fundamental é para esta Deputación, como así quedará demostrado na inauguración e na clausura, coa proxección de senllas producións rodadas en Ourense".

Na súa intervención quixo poñer de relevo que para facer realidade esta nova edición "contamos cun colaborador imprescindible como a Fundación Carlos Velo, que homenaxea a un dos grandes de Ourense como berce do cinema en Galicia", agradecendo tamén ás entidades colaboradoras o seu compromiso co festival e felicitando á dirección do OUFF e á área de Cultura da Deputación polo traballo desenvolvido".

No acto de presentación do Festival Internacional de Cine de Ourense, que comezará o próximo venres, día 24 e rematará o sábado, 2 de outubro, tamén participaron o conselleiro de Cultura, Román Rodríguez; a presidenta da Fundación Carlos Velo, Carmen Leyte; o director do certame, Miguel Anxo Fernández; Rubén Saavedra, director territorial de Abanca; e o director de La Región, Xosé Pastoriza.

Román Rodríguez felicitou ao festival por esta 26 edición "cando hai moi poucos proxectos culturais na Galicia contemporánea que poidan pasar as vodas de prata con brillantez, e onde se comproba a grandísima identificación coa cidade e a provincia de Ourense e a notable implicación público-privada". Unha iniciativa, afirmou, "moi importante para un sector tan puxante na cultura galega como é o audiovisual, nun momento de esplendor creativo e de madurez, e con recoñecemento nacional e internacional". Unha aposta clara, sinalou, "pola industrialización e a modernización dun sector que en Galicia dá traballo a máis de 2.000 persoas, con máis de 130 empresas e que xera ingresos superiores aos 127 millóns de euros".

Carmen Leyte, que recordou "o empeño de Manuel Baltar para que continuase o festival más antigo e importante de Galicia", destacou a entrada en escena do OUFF da Fundación Carlos Velo "cos seus obxectivos claramente impulsores do audiovisual galego, seguindo o imaxinario do cineasta de Cartelle, e recollendo con responsabilidade e orgullo a organización e xestión do festival".

Miguel Anxo Fernández, pola súa banda, foi o encargado de detallar o contido do programa "dun certame que este ano reforza a condición de xurado internacional da sección oficial, con representantes de México, Uruguai, Portugal e España, así como coa cinematografía de Portugal e de México, que se suman á comezada con Francia na pasada edición, ademais da concesión da Calpurnia de Honra Internacional á actriz lusa Leonor Silveira ", subliñando ademais que "dos 71 filmes de diferente formato que compoñen esta edición, 33 teñen participación galega".

Na web ouff.org están dispoñibles todos os detalles da programación e actividades do 26 Festival Internacional de Cine de Ourense.

A Deputación continúa a impulsar o turismo deportivo provincial co “Trail do Xurés�

• A segunda edición desta proba que organiza o Inorde coa colaboración da Axencia de Turismo de Galicia, celebrarase o vindeiro sábado, 25 de setembro, no termo municipal de Muíños

Ourense, 20 de setembro de 2021.- A Deputación de Ourense continúa a impulsar o turismo deportivo provincial coa celebración da segunda edición do "Trail do Xurés", proba que se disputará o vindeiro sábado, 25 de setembro, a partir das 16.30 horas, no termo municipal de Muíños. A presentación do evento deportivo tivo lugar hoxe no Pazo Provincial, acto no que participou o presidente da Deputación de Ourense, Manuel Baltar; o alcalde de Muíños, Plácido �lvarez; e a directora da Axencia de Turismo de Galicia, Nava Castro.

O "Trail do Xurés" forma parte do "ecosistema de turismo deportivo que estamos a poñer en valor desde hai tempo asistindo, nestes últimos tempos, case a proba por semana como a "Arnoia Termal Bike", a marcha cicloturista pola Ribeira Sacra, a Volta Ciclista Feminina a España e, en definitiva, seguimos con esa aposta desde o goberno provincial e nesta ocasión en Muíños que é unha das postais da provincia de Ourense e de Galicia, con ese Complexo Turístico do Corgo, que desde a Deputación temos o compromiso de continuar a impulsar porque poucos lugares hai en Galicia tan fermosos e que se adapten tanto a esa idea que temos de turismo deportivo", explicou o presidente da Deputación de Ourense.

Os participantes no "Trail do Xurés" como no resto de probas deportivas son "prescriptores de opinión e repiten e recomendan, e grazas á Gladiator Race e ás outras probas que puxemos en marcha nos últimos tempos, estamos a dar visibilidade a este territorio", dixo Manuel Baltar, quen lembrou que estamos a pouco tempo de que chegue o AVE e "este tipo de probas, coas que xa temos experiencia e coas que quedou acreditada a capacidade de xestión para poñelas en marcha, van a ser lanzadeiras dese protagonismo que Ourense merece", dixo Manuel Baltar.

Esta proba, organizada polo Inorde coa colaboración da Axencia de Turismo de Galicia, celebrarase "un día despois de que se aproben os orzamentos desta Deputación para o ano 2022, unha vez máis serán os primeiros de calquera administración pública en España, é dicir, o primeiro documento orzamentario do 2022 aprobarase en Ourense", engadiu o presidente do goberno provincial.

O percorrido da "Trail do Xurés" será de 17 quilómetros cun desnivel aproximado de 600 metros que levará "aos 200 participantes a coñecer lugares emblemáticos e de gran beleza de Muíños e da nosa comarca, así como os nosos produtos o que nos axuda a tratar de frear, na medida posible, a despoboación galopante dos concellos rurais", sinalou o alcalde de Muíños, quen agradeceu, unha vez máis, a colaboración do presidente da Deputación de Ourense, nesta ocasión a través do Inorde, e da Xunta de Galicia, para desenvolver esta proba porque "así é como se fai provincia achegándonos aos concellos que están máis afastados da capital".

Pola súa parte, Nava Castro dixo que o "Trail do Xurés" é "outra das probas que forma parte do convenio de colaboración asinado entre o Inorde e a Turismo de Galicia para realizar ao longo do ano diferentes eventos que contribúan a promocionar o potencial turístico da nosa provincia a través do deporte e supoñan un pulo para os sectores económicos de proximidade".

Para a directora da Axencia de Turismo de Galicia, este tipo de probas contribúen a que a provincia de Ourense "continúe a gañar enteiros como un destino turístico completo, con atractivos que o converten nun destino turístico diferenciado e exclusivo".

Aprobadas as bases para o programa de Termalismo Saudable e Cultura Termal 2021

• Na Xunta de Goberno celebrada hoxe concedéronse máis de 340.000 euros en subvencións a clubs deportivos ourensáns e preto de 193.000 euros en cooperación con entidades culturais e veciñais e concellos.

Ourense, 20 de setembro de 2021.- A Xunta de Goberno da Deputación de Ourense, reunida hoxe por vía telemática baixo a presidencia de Manuel Baltar, aprobou as bases do programa de Termalismo Saudable e Cultura Termal de 2021, que oferta estancias e tratamentos en sete balnearios da provincia, facilidades para a mobilidade e a oportunidade de coñecer os recursos naturais e culturais da provincia. Unha iniciativa que procura o desenvolvemento e promoción dun sector económico e social estratéxico no marco do plan "Ourense, Provincia Termal". As axudas incluídas neste programa concederanse por orde de recepción das solicitudes ata esgotar o seu orzamento total, que alcanza os 40.000 euros.

O programa de Termalismo Saudable consta de dúas modalidades: estancias balnearias con ou sen transporte en tren, e tratamentos terapéuticos sen estancia. As estancias balnearias, con axudas que van desde os 10 ata os 60 euros, terán unha duración de seis días, de luns a sábado, en réxime de pensión completa, incluíndo 10 técnicas balnearias, a posibilidade de revisión médica e animación social. Para as estancias con transporte en tren, os usuarios teñen incluído o billete de ida e volta desde algunha das "estacións termais" que participan no programa –referidas no convenio subscrito entre Deputación de Ourense e Renfe- con destino á estación de Ourense. Neste caso, os balnearios proporcionan o traslado ata as instalacións e rutas culturais seleccionadas. Existen tamén estancias con ou sen tren para grupos formados por un mínimo de 20 persoas. Os tratamentos terapéuticos sen estancia (reumatolóxico e respiratorio) inclúen axudas de entre 20 e 70 euros, con consulta médica e a posibilidade de realizar 35, 20 ou 10 técnicas balnearias repartidas ao longo de 15 días.

O programa de Cultura Termal financia con entre 10 e 20 euros estancias de fin de semana nos balnearios da provincia de dous días de duración, de sábado a domingo, incluíndo pensión completa e dúas técnicas balnearias para adultos.

Os balnearios adheridos ao programa son os de Baños de Molgas, O Carballiño, Arnoia, Laias, Lobios, Cortegada e Caldas de Partovia. As solicitudes poderán presentarse por vía telemática (termalismourense.com) desde o día seguinte á publicación destas bases na Base de datos Nacional de Subvencións.

A Xunta de Goberno tamén aprobou a concesión de subvencións a clubs deportivos ourensáns para o presente ano por un importe superior aos 340.000 euros, axudas das que se beneficiarán preto de 80 clubs, asociacións e escolas que representan a máis de trinta disciplinas.

No capítulo de cooperación con entidades, a Asociación Impulsora da Casa da Lusofonía recibirá 14.000 euros para a creación dunha sede en Ourense; a Asociación de Veciños de Puxedo (Lobios) contará con 27.000 euros para o Ecomuseo do Pan do Xurés e implementar de ferramentas tecnolóxicas; e o Club Deportivo Arenteiro disporá de 15.000 euros para gastos de funcionamento. Este apartado complétase coa concesión de 6.000 euros á Federación Galega de Atletismo para actividades en pista cuberta; 20.000 euros para a Fundación Carlos Velo con destino a gastos de funcionamento; e 17.000 euros a favor de Juan Pablo Rivas para o Congreso de Innovación e Ideas Disruptivas celebrado en 2020.

No capítulo de cooperación cos concellos aprobáronse dúas axudas: 48.000 a favor do Concello de Avión para executar obras na estrada que une Vilar e Barroso, e case 46.000 euros para a construción dun depósito de auga destinado á protección contra incendios no polígono industrial de San Cristovo de Cea.

Sinalar por último a modificación do Plan Provincial de Cooperación ás obras e servizos municipais e da rede viaria provincial do presente exercicio, relativa a unha obra do Concello de Pereiro de Aguiar.