Alumnos do colexio Padre Feijóo-Zorelle, protagonistas dun pleno infantil e xuvenil na Deputación de Ourense

• 43 estudantes de 3º de Educación Infantil e de 4º da ESO participaron xunto a Manuel Baltar nunha sesión plenaria na que debateron sobre mobilidade, medio ambiente e servizos sociais.

Ourense, 26 de abril de 2017.- O Salón de Plenos da Deputación de Ourense acolleu esta mañá a 43 alumnos de 3º de Educación Infantil e de 4º da ESO do Colexio Padre Feojóo-Zorelle de Ourense, quen, acompañados polos seus profesores, protagonizaron xunto ao presidente da Deputación, Manuel Baltar, e aos deputados provinciais, Montserrat Lama e Manuel Doval, un pleno infantil e xuvenil no que se aprobaron "por maioría" mocións relativas a temas de melloras na mobilidade, medio ambiente e servizos sociais.

O presidente da Deputación de Ourense destacou a importancia de levar a cabo este tipo de eventos que achegan a institución aos máis novos e explicoulles aos alumnos as actividades que se desenvolven no Salón de Plenos da institución provincial.

Os alumnos propuxeron diferentes iniciativas de mobilidade e medioambiente, e o presidente destacou que neste senso ao pleno do vindeiro venres, correspondente ao mes de abril, irá unha proposta para destinar 200.000 euros a un plan de transporte metropolitano da comarca de Ourense.

Ao remate do pleno, cada alumno foi agasallado cunha medalla acreditativa e cos libros O patrimonio provincial da ourensanía e Aproximación ao pensamento e ideoloxía de Vicente Risco.