Ourense é ata o domingo a capital dos camiños xacobeos de Europa co XIII Congreso Internacional de Asociaciones Jacobeas

O presidente da Deputación, Manuel Baltar, participou esta tarde no Liceo de Ourense na recepción oficial aos participantes no encontro "Camiños de Santiago, camiños culturais; unha mirada a Europa", que se desenvolve ata o domingo co apoio do goberno provincial

Pola mañá, Manuel Baltar recibiu na Sala de Xuntas do Pazo Provincial a unha delegación do congreso

Ourense, 20 de abril de 2023.- O presidente da Deputación, Manuel Baltar, participou esta tarde no Liceo de Ourense na recepción oficial aos participantes no congreso "Camiños de Santiago, camiños culturais; unha mirada a Europa", que se celebra ata o domingo 23 de abril organizado pola Asociación Cultural Amigos do Camiño Mozárabe-Vía da Plata Ourense e o apoio da Deputación de Ourense e a Xunta de Galicia.

Na súa intervención, Manuel Baltar resaltou o nivel da programación deste congreso, que reúne en Ourense a 225 persoas procedentes de 43 asociacións xacobeas de 12 países, e abrangue un programa con 4 mesas redondas, 8 conferencias e 19 ponentes.

O presidente da Deputación incidiu no peso específico da Vía da Plata como eixo de desenvolvemento de territorio, resaltando o "máximo compromiso" do goberno provincial coa potenciación do Camiño de Santiago.

Manuel Baltar estivo acompañado esta tarde na recepción oficial polo presidente da Asociación Cultural Amigos do Camiño Mozárabe-Vía da Plata Ourense, José Luis Rodríguez Cid; o presidente da comisión organizadora do congreso, José Antonio Quintas; e Jorge Martínez, presidente da Federación Española de Asociaciones de Amigos del Camino de Santiago (FEAACS). O acto pechouno a Real Banda de Gaitas da Deputación de Ourense.

Recepción no Pazo Provincial

Pola mañá, Manuel Baltar recibiu na Sala de Xuntas do Pazo Provincial a unha delegación dos participantes no congreso, entre os que se encontraron, ademais do comité organizador, o presidente de FEAACS, Jorge Martínez; Peter Hesseling, en representación de Europa Compostela e presidente da Sociedade Holandesa de San Jacobo; e directivos de FEAACS.

Programación de mañá, venres 21 de abril

A xornada matinal de mañá celebrarase no Centro Cultural Marcos Valcárcel, onde se desenvolverá o resto deste encontro xacobeo. O acto de apertura contará co presidente da Deputación xunto ao presidente da Xunta de Galicia, Alfonso Rueda.

Trala sinatura do acordo "Europa-Compostela", o programa continuará cunha conferencia inaugural a cargo do escritor Jesús Sánchez Adalid. Antes do almorzo e por videoconferencia, o catedrático de Historia da Arte, Miguel Taín Guzmán, falará sobre a catedral de Santiago, para seguir cunha mesa redonda sobre os novos desafíos na cultura coa participación representantes do estado, da Xunta e da universidade.

A sesión de tarde iniciarase cunha charla do profesor e sacerdote Miguel �ngel González sobre o mosteiro de Oseira no camiño, á que seguirá unha nova mesa redonda que abordará a tradicional acollida no camiño coa participación de hospitaleiros. O escritor Fernando Santos Urbaneja porá fin a esta primeira xornada cunha conferencia sobre as raíces de Europa.

As asociacións xacobeas no mundo

O sábado, día 22, intervirá en primeiro lugar a doutora e catedrática en Dereito Administrativo da Universidade de Santiago, María Teresa Carballeira, para falar do dereito, os itinerarios culturais e o Camiño de Santiago. Os camiños en Europa centrarán a mesa redonda que se celebrará a continuación con representantes de asociacións e do Xacobeo 21-22. Xa pola tarde, o director de Xestión do Plan Xacobeo, Ildefonso de la Campa, exporá o Plan Director dos Camiños de Santiago en Galicia 2022-2027. O historiador e escritor, Francisco Singu, falará despois dos renacementos no camiño compostelán, para continuar cunha mesa redonda sobre as asociacións no mundo con representantes españoles, americanos, de Países Baixos e Alemaña.

O congreso rematará o domingo cunha conferencia do presidente do Comité Internacional de Expertos do Camiño de Santiago, Manuel Castiñeiras, que analizará os símbolos da peregrinación xacobea, e á que seguirá o acto de clausura. Os congresistas asistirán finalmente a unha misa solemne na Catedral, presidida polo bispo de Ourense, Leonardo Lemos, coa actuación da Coral de Ruada.

No programa figuran ademais tres visitas a outros tantos puntos da provincia como a Ribeira Sacra, incluído o mosteiro de Santo Estevo de Ribas de Sil e unha viaxe no catamarán, e ás vilas de Allariz e Celanova.

Cita trienal coa tradición xacobea

A Federación Española de Asociacións de Amigos do Camiño de Santiago celebra desde 1987 e con carácter trienal este congreso internacional no que veteranos peregrinos e investigadores intercambian experiencias e coñecementos relacionados coa tradición xacobea.

Organizado pola Asociación Cultural Amigos Camiño Mozárabe-Vía da Plata, nesta ocasión a cita procura poñer en valor o Roteiro Xacobeo, declarado en 1987 "Primeiro Itinerario Cultural europeo", elixindo Ourense como sede "pola súa monumentalidade, historia, patrimonio, comunicacións, cooperación das institución e por ser cidade peregrina e de xenerosa hospitalidade".