O presidente da Deputación, Luis Menor, pon o foco na “innovación� do termalismo, no Foro La Región

O presidente da Deputación de Ourense, Luis Menor, clausurou o Foro La Región sobre Termalismo e Saúde poñendo o foco sobre a "innovación" que caracteriza a este recurso "tan inmenso" en Ourense

Laias, 2 de decembro de 2024.

O presidente da Deputación de Ourense, Luis Menor, clausurou o Foro La Región sobre Termalismo e Saúde poñendo o foco sobre a "innovación" que caracteriza a este recurso "tan inmenso" en Ourense. En concreto, Menor reparou nas novidades do ámbito de explotación como o "camiño emprendido" pola Deputación de Ourense para "atraer a atención cara as nosas augas e establecementos termais".

"A Deputación de Ourense estase a converter en todo un referente á hora de explorar novas vías no uso terapéutico do termalismo", sinalou o presidente provincial, que subliñou a "firme aposta" dende o sector público por potenciar este recurso, que sitúa a Ourense "como segunda potencia europea".

Tamén puxo en valor a "multiplicación de esforzos" a través de políticas públicas que "coiden do benestar da cidadanía e da súa saúde mental".

Menor fixo balance do programa de Termalismo Social, con cifras como as 25.000 solicitudes de axudas recibidas para estadías en balnearios; preto de 100.000 pernoctacións; máis de 200.000 técnicas termais administradas e ademais, unha contribución directa aos nosos balnearios cifrada en 7 millóns de euros.

Ademais, o presidente provincial lembrou a importancia da vertente turística, pois o 70 % dos solicitantes dos programas da Deputación de Ourense residen fóra da provincia.

"Nunha sociedade que alza a voz contra a masificación do turismo, desde Ourense podemos ofrecer unha ampla variedade de programas que se axusten ás preferencias ou necesidades das persoas, nun entorno saudable, relaxante, amable, para socializar fronte a soidade e mesmo para traballar desde a distancia", reflexionou Menor.

Os escolares lembran a Eduardo Blanco Amor na tradicional ofrenda floral no cemiterio de San Francisco

2 de decembro de 2024.

O cemiterio de San Francisco acolleu esta mañá a tradicional ofrenda floral homenaxe ao escritor ourensán Eduardo Blanco-Amor, ao carón do lugar onde repousan os seus restos. Este acto realízase, organizado pola fundación que leva o nome do autor, cada 1 de decembro con motivo do aniversario do pasamento do intelectual ourensán, hai xa 45 anos. Neste caso, por coincidir en domingo, trasladouse ao luns a ofrenda. A Deputación de Ourense sumouse a esta conmemoración coa participación do director da área de Cultura, Marcos Vázquez.

Esta homenaxe a Blanco-Amor no cemiterio de San Francisco naceu a comezos dos anos 80, a iniciativa de Marcos Valcárcel e outros amigos de Eduardo Blanco-Amor, á que se sumou de inmediato o IES de A Ponte, que nesa época pasaría a chamarse IES Eduardo Blanco Amor a petición da profesora María do Carmo Henríquez Salido.

O presidente da Fundación Eduardo Blanco Amor, Luis González-Tosar, participou no acto acompañado polos rapaces do instituto que leron poemas fronte a tumba do escritor.

Un premio de récords

Cabe recordar que o XLIII Premio de Novela Eduardo Blanco-Amor recaeu no escritor porriñés Diego Giráldez polo seu traballo "As obras póstumas", escollido entre un total de 49 orixinais presentados a esta edición, máis do dobre dos recibidos en 2023. Organizado pola Fundación Eduardo Blanco-Amor coa colaboración da Deputación de Ourense, o premio está dotado con 15.000 euros e unha peza artística do escultor Acisclo Manzano. O premio entregarase o próximo 13 de decembro nunha gala literaria no Liceo de Ourense.

A vicepresidenta primeira da Deputación de Ourense, Marta Nóvoa, recibiu no Salón de Plenos a medio cento de alumnos do CIFP Portovello

A vicepresidenta primeira da Deputación de Ourense, Marta Nóvoa, recibiu no Salón de Plenos a medio cento de alumnos do CIFP Portovello, de varios ciclos.

A vicepresidenta primeira explicoulles aos mozos o funcionamento da Deputación e da celebración dun pleno.

Marta Nóvoa contoulles como se axuda aos concellos ourensáns dende o organismo provincial. "Hai un gran número de traballadores recorrendo a provincia, a Deputación axuda aos concellos para que poidan por en marcha os seus proxectos".

Os rapaces interesáronse por saber cales son as principais solicitudes de axuda dos concellos.

A Deputación destina unha axuda de 600.000 euros para a modernización da instalación do regadío da Limia

A Xunta de Goberno tamén concedeu axudas á cooperación con diferentes entidades culturais, empresariais e deportivas, así como con municipios por un importe de 284.732,29 euros

Ourense, 2 de decembro de 2024.

A Xunta de Goberno da Deputación de Ourense vén de aprobar, na súa sesión ordinaria semanal, diversas axudas por un importe total de 884.732,29 euros.

Así, de todas elas destaca a achega concedida á Comunidade Xeral de Regantes Nova Limia para a modernización do instalación do regadío, cun importe total de 600.000 euros. A Xunta de Goberno cumpre así cos acordos plenarios do 24 de novembro de 2023 e do 26 de abril de 2024 onde quedara reflectido dito compromiso que hoxe queda materializado na cantidade acordada naquelas sesións.

O resto das axudas, cifradas en 284.732,29 euros, están destinadas a diferentes entidades (45.000 euros) e a concellos da provincia (239.732,29). As entidades beneficiarias das achegas aprobadas hoxe son a Asociación Coordinadora Festa da Istoria para gastos de organización da Festa da Istoria; a Asociacion Ruta do Viño do Ribeiro para actividades de promoción e Claqueta Coqueta SL, para o proxecto "Os Centenarios".

No que atinxe aos concellos, destináronse axudas para amortizacións de débeda; para acondicionamento de espazos públicos; para o cofinanciamento de melloras de camiños, de instalacións e servizos, así como de adecuacións de humanizacións para o fortalecemento da actividade comercial en áreas turísticas; e tamén para melloras na rede viaria.