Manuel Baltar: "A estrea de 'Amigos hasta la muerte' en Ourense é outro éxito na nosa estratexia de impulso ao audiovisual"

O Teatro Principal acolleu esta tarde a "premiere" da película, a primeira coprodución internacional patrocinada pola Deputación de Ourense e que despois do seu paso polos cines estará en Amazon Prime

"Este é un filme no que o protagonista é Ourense. O audiovisual é unha potente ferramenta de promoción da provincia que nos permite abrir unha ventá de oportunidades do noso territorio cara o exterior", salientou o presidente da Deputación na súa intervención

O director da longametraxe, Javier Veiga, agradeceu a colaboración institucional comezando pola da Deputación de Ourense, "o primeiro apoio é chave para arrancar este proxecto"

Ourense, 28 de marzo de 2023.- O Teatro Principal de Ourense acolleu esta tarde a estrea do filme "Amigos hasta la muerte", unha comedia romántica dirixida polo pontevedrés Javier Veiga co patrocinio da Deputación de Ourense.

O presidente do goberno provincial, Manuel Baltar, interveu na presentación da película acompañado polo director do Agadic, Jacobo Sutil; o produtor e presidente da Academia Galega do Audiovisual, �lvaro Pérez Becerra; a actriz protagonista Marta Hazas e o propio director dunha longametraxe que xa é a primeira coprodución internacional da Deputación de Ourense, e que despois do seu paso polos cines estará en Amazon Prime.

"Este é un filme no que o protagonista é Ourense. O audiovisual é unha potente ferramenta de promoción da provincia que nos permite abrir unha ventá de oportunidades do noso territorio cara o exterior", salientou Manuel Baltar, quen definiu a película e o seu estreo en Ourense como "un novo éxito da estratexia do goberno provincial de apoio ao sector audiovisual, servindo este como un motor de desenvolvemento socioeconómico da provincia".

"Este proxecto audiovisual volve a ratificar a nosa aposta por converter Ourense nun gran plató de cine, mostrando as potencialidades deste territorio como escenario de producións audiovisuais e facilitando en todo momento a captación de rodaxes", explicou o presidente provincial na "premiere" da película, que contou no Teatro Principal coa presenza do equipo técnico e artístico da longametraxe, institucións e empresas colaboradoras e representantes da vida sociocultural da provincia.

"Este filme constitúe un fito máis no apoio ao sector audiovisual como axente dinamizador da provincia, unha estratexia que ten dado outros froitos como a creación do Ourense Film Commission, a alianza coa Academia Galega do Audiovisual -materializada na recente celebración en Ourense dos Mestre Mateo- ou o rescate e impulso do Festival de Cine Internacional de Ourense", salientou Manuel Baltar.

Pola súa banda, Jacobo Sutil resaltou o apoio da Xunta de Galicia á industria audiovisual galega, un aspecto no que tamén incidiron nas súas intervencións �lvaro Pérez Becerra e o director, Javier Veiga, que despois de recordar que o Teatro Principal tamén acolleu a estrea da obra de teatro na que está baseada esta película puxo en valor a colaboración institucional, comezando pola Deputación, "o primeiro apoio e chave para arrancar este proxecto".

"Amigos hasta la muerte", unha comedia romántica sobre os límites da amizade

"Amigos hasta la muerte" é unha comedia romántica sobre os límites da amizade dirixida polo pontevedrés Javier Veiga, supoñendo a súa primeira longametraxe como director. O propio Veiga protagoniza o filme xunto con Marta Hazas e Mauricio Ochmann, ademais de contar con actores como Xosé A. Touriñán e os ourensáns Ledicia Sola e Nacho Nugo. Rodado na cidade de Ourense e na Vía da Prata, o argumento baséase na obra de teatro homónima -escrita, dirixida e protagonizada tamén por Javier Veiga- e que contou cunha adaptación en galego, "Amigos ata a morte", colleitando un enorme éxito na súa xira por Galicia da man de actores como Xosé A. Touriñán, Ledicia Sola e David Amor. A obra tamén foi adaptada a outras linguas, acadando éxitos en Euskadi, México, EEUU, Porto Rico ou Panamá.

Javier Veiga, Marta Hazas e Mauricio Ochmann son neste filme Suso, María e Nacho, tres amigos que rozan os corenta, cunha longa amizade ás costas e con historias románticas cruzadas. Unha traxedia persoal suporá voltar a vista atrás e analizar temas pendentes e afrontar segredos. Esta comedia romántica, ou comedia dramática, analiza os límites da amizade dentro dun particular triángulo amoroso: os protagonistas terán que responder preguntas como cal sería a túa resposta se a túa parella se fora co teu mellor amigo, se é mellor mentir a persoa que máis queres para evitar que sufra ou se poderías perdoar calquera cousa por amor.

O filme, producido por Medio Limón, Sygnatia, Onírica Films e Ainé, vén de participar na sección oficial fóra de concurso do Festival de Cine de Málaga.

A provincia de Ourense convertida nun gran plató de cine

Esta estratexia de captación de rodaxes ten convertido nos últimos tempos a Ourense no protagonista de múltiples producións audiovisuais que contaron co patrocinio da Deputación. De feito, no 2022 chegaron a coincidir na provincia a rodaxe simultánea de  filmes como "La manzana de oro", "Honeymoon", "O home e o can", e "13 exorcismos", así como a serie "Motel Valkirias". Ademais, tamén se rodaron o pasado ano en Ourense longametraxes como a propia "Amigos hasta la muerte", "Nueva Tierra", "El Tirabeque", e outros proxectos con ADN ourensá como "O corpo aberto" ou o documental "Peregrinas" de José Antonio Vázquez Taín.

Femembalses traslada á Dirección General de Tributos a necesidade de axustar a tributación dos concellos afectados por encoros transfronteirizos

O vicepresidente Rosendo Fernández participou en Madrid nesta reunión da directiva da Federación de Asociaciones y Municipios con Centrales Hidráulicas y Embalses (Femembalses) coa Dirección General de Tributos

Femembalses reclamou, entre outros temas, a necesidade de que a normativa vixente afonde no relativo á tributación polo aproveitamento dos recursos hídricos por parte dos concellos con centrais hidráulicas transfronteirizas, como é o caso en Ourense dos encoros de Salas e de Lindoso

A Federación tamén pediu a actualización do Imposto sobre Actividades Económicas na produción eléctrica, e reivindicou a lexitimidade dos concellos nos procesos de revisión catastral

Ourense, 28 de marzo de 2023.- O vicepresidente primeiro da Deputación, Rosendo Fernández, participou esta mañá en Madrid na reunión entre a directiva da Federación de Asociaciones y Municipios con Centrales Hidráulicas y Embalses (Femembalses) e a Dirección General de Tributos.

Rosendo Fernández asistiu a esta xuntanza, celebrada no Ministerio de Hacienda y Función Pública, en nome do presidente da Deputación, Manuel Baltar, quen ocupa a vicepresidencia primeira desta federación. O vicepresidente provincial estivo acompañado, entre outros, pola secretaria xeral de Femembalses, Maite Bardají; e o coordinador de Femembalses, Francisco Gómez. Por parte da Dirección General de Tributos asistiu a directora xeral de Tributos, María José Garde, e o subdirector xeral de Tributos Locais, Óscar del Amo.

O asunto principal deste encontro foi o relativo á tributación polo aproveitamento dos recursos hídricos nos embalses transfronteirizos, materia na que, segundo Femembalses, "existe un claro baleiro na normativa vixente". Concretamente, a Federación trasladou aos representantes da Dirección General de Tributos a necesidade de que os concellos con territorios inundados dunha presa situada noutro país poidan recadar o BICE -Bens Inmobles de Características Especiais-, así como outras posibles medidas que compensen o agravio comparativo dos entes locais afectados.

Esta situación inclúe na provincia de Ourense aos encoros de Salas -cos concellos afectados de Calvos de Randín e Muíños- e Lindoso -con Lobios, Entrimo, Lobeira e Muíños-. En relación a isto, Femembalses reclamou a importancia de trasladar esta problemática aos distintos foros sectoriais nos que se enmarca, é dicir: Tributario, Medioambiental e Política Exterior; así como a inclusión do asunto tributario no Convenio de Albufeira.

Outro dos puntos abordados nesta xuntanza foi a actualización do IAE -Imposto sobre Actividades Económicas- da produción eléctrica, unha tarifa xestionada polas entidades locais que leva sen revisar desde o 1996 e que desde Femembalses reclaman a súa actualización conforme ao incremento do IPC actual. Finalmente, a Federación de Asociacións e Municipios con Centrais Hidráulicas e Encoros tamén reivindicou ante a Dirección General de Tributos a lexitimidade dos concellos como parte interesada nos procesos de revisión catastral. Desde a Federación explican que "estes dous últimos, son temas nos que levamos traballando durante anos e que seguimos defendendo en todos os foros posibles".

A Deputación de Ourense colaborará coa Xunta de Galicia na potenciación do Centro Integral de Loita contra o Lume

O presidente do goberno provincial, Manuel Baltar, e o conselleiro do Medio Rural, José González, participaron esta mañá na inauguración das novas pistas de adestramento para vehículos todoterreo e motobombas

Manuel Baltar ratificou a colaboración con este complexo asumindo o acondicionamento da estrada de acceso a unhas instalacións que cualificou como "un proxecto con visión estratéxica e de interese xeral para Ourense, que se sitúa como referente estatal na formación de profesionais"

José González destacou a colaboración entre a Xunta e a Deputación de Ourense á hora de traballar para anticiparse aos lumes, citando os convenios asinados recentemente entre a Consellería, o goberno provincial e 13 concellos para a dotación de maquinaria de prevención de incendios forestais

No acto recoñeceuse o apoio ao proxecto do presidente do Parlamento galego, Miguel Santalices, a título póstumo do exconselleiro Valeriano Martínez e á veciñanza que cedeu os terreos do antigo hospital psiquiátrico no que se sitúan as novas instalacións

O presidente da Deputación tamén participou na entrega de 13 novas motobombas ao Servizo de prevención e extinción de incendios, catro das cales irán a outros tantos distritos forestais da provincia: Ribeiro-Arenteiro, Miño-Arnoia, Verín-Viana e A Limia

Toén, 28 de marzo de 2023.- O presidente da Deputación de Ourense, Manuel Baltar, afirmou hoxe que Ourense vaise converter nun "referente estatal na formación de profesionais" grazas á posta en marcha do Centro integral de loita contra o lume situado en Toén. Unhas instalacións promovidas pola Xunta de Galicia e que contarán co apoio da Deputación, que dentro da colaboración coa Consellería de Medio Rural se fará cargo do acondicionamento da estrada de acceso a este complexo.

Manuel Baltar, xunto ao conselleiro do Medio Rural, José González, visitou esta mañá o centro integral con motivo da inauguración das novas pistas de adestramento para vehículos todoterreo e motobombas, acto que incluíu a entrega de 13 vehículos ao Servizo de Prevención e Extinción de Incendios, catro dos cales teñen como destino a provincia ourensá.

Tamén estiveron presentes o director xeral de Defensa do Monte, Manuel Rodríguez; o delegado territorial da Xunta en Ourense, Gabriel Alén; o alcalde de Toén, Ricardo González; e o presidente do Parlamento de Galicia, Miguel Santalices, que foi director do antigo hospital psiquiátrico de Toén, transformado agora neste complexo para a formación na loita contra o lume. No acto, que contou coa presenza de veciños e traballadores do servizo de prevención e extinción de incendios, tamén interviu o bombeiro forestal Jorge García, xefe de brigada deste proxecto en Toén.

Manuel Baltar cualificou o centro como "un proxecto con visión estratéxica", referendando a colaboración da Deputación "en todas aquelas iniciativas que melloren a provincia e sexan de interese xeral para Ourense", citando como exemplo o Centro Galego de Innovación da Formación Profesional. Así, apuntou, o goberno provincial contribuirá a acondicionar os accesos a estas instalacións, "como tamén o fixo no caso do novo complexo hospitalario".

Tamén referiuse Manuel Baltar ao compromiso da Deputación na loita contra os incendios, subliñando que "non só poñemos á disposición da Xunta a nosa maquinaria nos labores de extinción, senón que tamén adquirimos tractores con rozadoiras para que os concellos podan facer traballos de prevención".

Recoñecemento a Miguel Santalices, Valeriano Martínez e á veciñanza polo apoio ao proxecto

Precisamente sobre este aspecto falou José González, que destacou a colaboración entre a Xunta e a Deputación de Ourense á hora de traballar para anticiparse aos lumes. Citou así os convenios asinados recentemente entre a Consellería, o goberno provincial e 13 concellos para a dotación de maquinaria de prevención de incendios forestais. Un compromiso ao que o conselleiro chamou a unirse ao resto de deputacións provinciais, por consideralo prioritario de cara á xestión e protección do noso territorio.

José González tivo ademais palabras de recoñecemento para Miguel Santalices, que xunto a Valeriano Martínez, conselleiro de Facenda no goberno de Feijoo e falecido hai dous anos, apostaron por este proxecto e conseguiron os fondos necesarios para a súa execución.

O presidente do Parlamento galego ampliou este recoñecemento á comunidade de montes veciñais de Moreiras e Trelle, que con 219 votos a favor de 222 acordou ceder para este proxecto os terreos do antigo hospital psiquiátrico de Toén, "unha escola de vida á que cheguei como director con 28 anos e onde os veciños sempre me fixeron sentir como na miña casa".

Tamén Ricardo González puxo en valor o apoio da veciñanza "para darlle unha solución á ruína do antigo sanatorio", trasladando ao conselleiro do Medio Rural o seu agradecemento "por ter a sensibilidade de recuperar estas instalacións", así como a Manuel Baltar "por sumar o apoio dunha institución próxima e imprescindible para calquera dos proxectos que poñemos en marcha no concello e pechar o círculo da colaboración entre administracións".

Pistas de adestramento, formación e investigación

A visita ao Centro integral de loita contra o lume de Toén serviu para inaugurar as pistas de adestramento para vehículos todoterreo e motobombas, que cunha lonxitude de máis de 1.400 metros e obstáculos para formar aos condutores, supuxeron un investimento de case 900.000 euros.

Pola súa banda, o Centro integral de loita contra o lume de Toén será un centro de referencia para a cooperación, a investigación e a formación continua en materia de incendios forestais, ao que poderán acudir bombeiros forestais procedentes de toda Europa e no que se contará cos maiores especialistas no comportamento e análise dos incendios forestais. O investimento alcanza os 15 millóns de euros, incluíndo a rehabilitación dos edificios e a ordenación de toda a contorna do centro, para convertela nun modelo de multifuncionalidade e biodiversidade forestal.

Ata agora a Consellería do Medio Rural investiu 3,5 millóns de euros para a adecuación da contorna, construción de viais e peche da parcela orixinal do complexo. O seguinte paso será a a rehabilitación do antigo edificio da lavandería para convertelo nun centro administrativo e de formación de brigadas forestais. O centro tamén contará cun aula medioambiental para formar e concienciar a estudantes de toda Galicia sobre o traballo dos profesionais contraincendios.

Motobombas para catro distritos forestais ourensáns

Manuel Baltar tamén participou na entrega de 13 novas motobombas ao Servizo de prevención e extinción de incendios, catro das cales irán a outros tantos distritos forestais da provincia de Ourense: Ribeiro-Arenteiro (XI), Miño-Arnoia (XII), Verín-Viana (XIV), e A Limia (XV).

Cun custo próximo aos 3,3 millóns de euros, financiados mediante o Plan de Recuperación, Transformación e Resiliencia -financiado pola Unión Europea- NextGenerationEU, estes vehículos  cargan 3.500 litros de auga e contan cun sistema de protección perimétrica con dous circuítos independentes. A entrega complétase con cursos teórico-prácticos destinados aos bombeiros forestais que conducirán as motobombas.

A Deputación reforza os servizos sociais do Concello de Avión colaborando na reforma e ampliación da residencia de maiores

O presidente do goberno provincial, Manuel Baltar, acompañado polo alcalde, Antonio Montero, visitou esta mañá o centro integral Alvetus, onde comprobou o estado das obras de reforma, ampliación e equipamento das instalacións, financiadas pola institución provincial

Esta iniciativa "fala da visión estratéxica e integral dos servizos sociais que ten o alcalde", sinala Manuel Baltar, que cualificou esta nova infraestrutura coma "unha gran noticia para a veciñanza de Avión"

Antonio Montero agradeceu a visita de Manuel Baltar e a contribución económica da Deputación para unhas obras "moi necesarias e mesmo urxentes porque se trata da atención aos nosos maiores e ese é un servizo que sempre incentivamos desde o concello"

A reforma do centro integral de servizos sociais permitirá incrementar ata 44 o número de prazas dispoñibles no complexo, no que traballan unha trintena de persoas

Avión, 27 de marzo de 2023.- O presidente da Deputación, Manuel Baltar, acompañado polo alcalde de Avión, Antonio Montero, visitou esta mañá o centro integral de servizos socias Alvetus, onde supervisou o estado das obras do proxecto de reforma, ampliación e equipamento das instalacións, financiado pola institución provincial.

Manuel Baltar felicitou ao rexedor por un proxecto "que fala da súa visión estratéxica e integral dos servizos sociais, dotando ao concello de Avión dunha infraestrutura na que ten colaborado a Deputación seguindo as propostas do alcalde".

O presidente do goberno provincial valorou positivamente a unificación dos servizos sociais do concello nun único centro, "e que agora mellora en infraestrutura, instalacións e equipamento, o que sen dúbida é unha gran noticia para a veciñanza de Avión e un recoñecemento ao labor do goberno local, que seguirá tendo sempre o apoio da Deputación".

Antonio Montero, que estivo acompañado polo tenente alcalde, Manuel Vázquez, a directora do centro, Sonia Nogueira, e persoal municipal dos servizos sociais, expresou o seu agradecemento pola visita de Manuel Baltar e a contribución económica da Deputación que permitiu executar este proxecto, no que tamén se acondicionou o entorno da propia residencia.

"Eran unha obras moi necesarias e mesmo urxentes -sinala o alcalde- porque se trata da atención aos nosos maiores e ese é un servizo que sempre incentivamos desde o concello". Unha iniciativa, engade "que ten como obxectivo principal seguir mellorando a calidade de vida das nosas veciñas e veciños".

A reforma e ampliación do centro integral de servizos permitirá incrementar ata 44 o número de prazas dispoñibles neste complexo, no que actualmente traballan unha trintena de persoas e que está xestionado pola Fundación Anduriña, da que forma parte o Concello de Avión.