Manuel Baltar: "A estratexia termal da Deputación potencia dende todos os ámbitos ao termalismo, o gran axente dinamizador do noso territorio"

O presidente da Deputación foi convidado a participar esta mañá na presentación, en Sâo Pedro de Sul, da "Agenda para a Valorização dos Territórios Termais para a Região Centro 2030", que tamén contou coa presenza da secretaria de Estado de Desenvolvemento Rexional e presidentes das cámaras municipais e asociacións termais desta rexión lusa

Manuel Baltar repasou na súa intervención, gravada, os principais fitos alcanzados nos últimos anos -como o plan de termalismo social, o termalismo deportivo, a dixitalización da oferta termal, o PST en "Ourense Termal" ou a colaboración co Campus da Auga- e novas iniciativas como o proxecto de dixitalización do ciclo da auga e o Gran Hotel Balneario

"A loita por poñer en valor os recursos termais", explica o presidente da Deputación, "ten que ser unha operación conxunta, e desde Ourense queremos lanzar unha mensaxe de coordinación, cooperación, e posta en común os recursos dos que dispomos"

"Para a Deputación, as cuestións termais son centrais, non só no programa de goberno senón na labor de concienciación á poboación de que contamos cun tesouro que debemos potenciar", remarca Manuel Baltar

Ourense, 22 de marzo de 2023.- O presidente da Deputación, Manuel Baltar, foi convidado a participar esta mañá na presentación, en Sâo Pedro de Sul, da Agenda para a Valorização dos Territórios Termais para a Região Centro 2030, un documento impulsado pola Comissão de Coordenação e Desenvolvimento Regional do Centro (CCDRC) que establece a ambición e afirmación desa rexión portuguesa como líder luso na innovación e sustentabilidade do recurso da auga mineral natural, centrándose na competitividade, na atracción e fixación no territorio de poboación cualificada, e a promoción do benestar e de estilos de vida saudables.

Na presentación da Agenda para a Valorização dos Territórios Termais para a Região Centro 2030 t, celebrada no auditorio do balneario Rainha Dona Amélia, tamén participaron autoridades lusas como a Secretaria de Estado de Desenvolvemento Rexional, Isabel Ferreira; a presidenta da CCDR, Isabel Damasceno, e presidentes das cámaras municipais e asociacións termais da rexión.

Na súa intervención, realizada a través dun vídeo, o presidente do goberno provincial e da Asociación Europea de Cidades Históricas Termais (EHTTA) fixo un repaso de todas aquelas actuacións en material termal que se teñen realizado na provincia co apoio do goberno provincial: "A estratexia termal da Deputación potencia dende todos os ámbitos ao termalismo, o gran axente dinamizador do noso territorio".

Manuel Baltar sinalou que "para min é unha honra participar nesta sesión, facelo como presidente da Deputación de Ourense, presidente da EHTTA, e tamén como presidente do Foro Termal do Eixo Atlántico, esa organización pública que reúne as poboacións de Galicia e norte de Portugal, e que conta tamén como un área estratéxica de desenvolvemento co termalismo, algo que todos debemos protexer, impulsar, promover e favorecer".

O presidente do goberno provincial destacou que "a auga é vida, e a auga termal é saúde. Despois dos tempos da pandemia, o termalismo entra nunha nova dinámica, nun escenario no que se fai máis presente ca nunca a necesidade das augas mineiro-medicinais, do relax, da tranquilidade, do medio ambiente". Ademais, Manuel Baltar quixo reivindicar a inclusión dos servizos termais nos sistemas nacionais de saúde, "unha reclamación que desde Ourense facemos a nivel nacional".

A experiencia termal en Ourense

No seu relatorio, Manuel Baltar realizou unha exposición das ferramentas implementadas polo goberno provincial ao longo dos últimos anos. O presidente da Deputación destacou fitos como  o plan "Ourense, la provincia termal", un programa que "establecía unha serie de fitos, cuestións e actuacións que se foron cumprindo co paso do tempo, facendo que poidamos dicir que Ourense é o territorio de maior potencial termal de Europa".

Manuel Baltar tamén fixo referencia á mellora nas comunicacións coa liña de Alta Velocidade Madrid-Ourense, "conectando as 15 vilas termais de Ourense coas cidades españolas e europeas". En relación a estas vilas termais, Manuel Baltar destacou que "son concellos que contan tamén na súa estratexia de desenvolvemento con esa cuestión termal que desde a Deputación apoiamos e promovemos, servindo de exemplo eses 8 balnearios abertos ao público cuxas prazas se cobren en tempo récord". "Estamos a falar dun programa que está protagonizado ao 100% pola administración electrónica, podendo contar en minutos cun aloxamento nos nosos balnearios, e que serve de escusa para coñecer Ourense e, de paso, darse conta da monumentalidade, da riqueza gastronómica, etnográfica que pode ofertar un territorio como o noso".

"Nove balnearios, un programa de termalismo social, 15 vilas termais e a Deputación de Ourense despregando unha actividade que permite que hoxe en día poñamos en marcha plans termais con financiación comunitaria", destacou Manuel Baltar, quen nesta liña tamén recordou o Plan de Sustentabilidade Turística "Ourense Termal" e o plan "Raia Termal" como exemplos de cooperación e sustentabilidade, "chave para poñer en marcha estruturas termais e valorizar o territorio grazas a unha estratexia que persigue o benestar da veciñanza e a potenciación deses recursos termais".

O termalismo ligado ao coñecemento e innovación

O presidente provincial reivindicou que "o termalismo está ligado ao coñecemento e á innovación", poñendo en valor a colaboración da Deputación co Campus da Auga, "un novo motor de desenvolvemento do noso termalismo". Outro punto da intervención de Manuel Baltar nesta cita en Portugal foi o termalismo deportivo, "vencellado a unha estratexia provincial da auga que ten reportado grande visibilidade a Ourense e unha capacitación deportiva coa que antes non contábamos".

Por outra banda, Manuel Baltar destacou outros proxectos coma a dixitalización do ciclo integral da auga, "que fará que Ourense sexa un territorio punteiro na investigación"; o Observatorio Mundial do Termalismo, cunha dinámica de traballo "baseada na participación, transparencia e goberno aberto"; e o proxecto do Gran Hotel Balneario Auria.

Finalmente, o presidente do goberno provincial lembrou a feira termal Termatalia, apoiada pola Deputación, nesa aposta "por facer visible o termalismo a nivel mundial". "A loita por poñer en valor os recursos termais ten que ser unha operación conxunta, e desde Ourense queremos lanzar unha mensaxe de coordinación, cooperación, e posta en común os recursos dos que dispomos. Para nós, as cuestións termais son centrais, non só no programa de Goberno senón na labor de concienciación á poboación de que contamos cun tesouro que debemos potenciar", concluíu Manuel Baltar.

Rosendo Fernández participa na inauguración de Previsel

Ourense, 22 de marzo de 2023. O vicepresidente primeiro da Deputación, Rosendo Fernández, participou esta mañá en Expourense na inauguración do 16º Salón de Prevención e Seguridade Laboral de Galicia (Previsel), que conta coa colaboración do goberno provincial.

Previsel, que se celebra hoxe e mañá en Expourense, ofrecerá formación especializada en prevención e seguridade laboral impartida por expertos na materia.

Manuel Baltar defende no Día Mundial da Auga a contribución das cidades termais "a crear conciencia sobre a conservación deste prezado recurso"

Nunha mensaxe difundida con motivo desta celebración, o presidente da Deputación de Ourense e da Asociación de Cidades Históricas Termais de Europa (EHTTA) destaca o papel xogado pola auga "no desenvolvemento dos nosos pobos e rexións termais durante centos de anos"

Afirma que os membros da EHTTA poden axudar "ao uso e tratamento sostible deste recurso, favorecendo unha maior conciencia sobre a necesidade de mudar hábitos"

Ourense, 22 de marzo de 2023.- O presidente da Deputación de Ourense, Manuel Baltar, en calidade de presidente da Asociación de Cidades Históricas Termais de Europa (EHTTA), defende a contribución das cidades balnearias "a xerar un uso máis consciente da auga e crear conciencia sobre a conservación dese prezado recurso".

Nunha mensaxe difundida hoxe con motivo da celebración do Día Mundial da Auga, Manuel Baltar destaca o papel xogado pola auga "no desenvolvemento dos nosos pobos e rexións termais durante centos de anos", polo que afirma que os membros da EHTTA poden axudar "ao uso e tratamento sostible deste recurso, favorecendo unha maior conciencia sobre a necesidade de mudar hábitos".

Nesta xornada, instaurada polas Nacións Unidas en 1992, Baltar afirma que por toda Europa pódense atopar exemplos deste proceso de cambio, citando o uso da auga termal para quentar edificios e distritos, a aplicación de tratamentos que non acaben contaminando as concas fluviais, a elección de produtos que non conteñan microplásticos ou a reutilización das augas residuais para regar plantas e cultivos.

Tomando como referencia o lema desta celebración, "Acelerar o cambio", Manuel Baltar pide traballar xuntos para "resolver a crisis mundial da auga e o saneamento", o que tamén permitirá facer fronte a outros grandes problemas da humanidade como a saúde, a fame, as desigualdades de xénero, a falta de oportunidades educativas ou a falta de emprego.

Neste sentido, Manuel Baltar lembra que a EHTTA asinou o pasado ano a Declaración de Glasgow sobre a acción climática no turismo, "co obxectivo de facilitar aos nosos membros o acceso á xestión do coñecemento sobre a acción climática e o desenvolvemento sostible, ademais de fomentar a protección do medio natural e cultural nun marco de responsabilidade e colaboración entre os sectores público e privado".

Así, e tamén como socia de apoio da Organización Mundial do Turismo, a EHTTA invita aos seus integrantes a "involucrarse en proxectos e traballar en estratexias relacionadas con estes temas, por suposto no uso responsable da auga, pero tamén na protección dos nosos recursos termais".

Luz Doporto participou na celebración do vixésimo aniversario de Down Ourense

Ourense, 21 de marzo de 2023.- A deputada Luz Doporto participou esta tarde no Teatro Principal na celebración do Día mundial do Síndrome de Down e o vixésimo aniversario de Down Ourense, nun acto que tamén contou coa presenza, entre outros, do conselleiro de Sanidade, Julio García Comesaña; o alcalde de Ourense, Gonzalo Pérez Jácome; ou o delegado da Xunta, Gabriel Alén.