Recepción ao alcalde da Peroxa

Ourense, 20 de febreiro de 2019.- O presidente da Deputación de Ourense, Manuel Baltar, recibiu hoxe no Pazo Provincial ao alcalde da Peroxa, Manuel Seoane.

Preto de 500 deportistas daranse cita no Campionato Galego de Piragüismo de Inverno

• A proba deportiva terá lugar o 23 de febreiro, en Castrelo de Miño.

Ourense, 20 de febreiro de 2019.- Preto de 500 deportistas procedentes de 41 clubs de toda Galicia daranse cita o día 23 de febreiro, en Castrelo de Miño, no Campionato Galego de Piragüismo de Inverno, "a primeira competición oficial da tempada 2019 e ademais será un campionato clasificatorio para o Campionato de España de Piragüismo de Inverno a celebrar en Sevilla a mediados de marzo", explicou o vicepresidente da Deputación de Ourense, Rosendo Fernández hoxe no Pazo Provincial na presentación deste evento deportivo.

No acto tamén participou o alcalde e a concelleira de Deportes de Castrelo de Miño, Xurxo Rodríguez e Maribel Rodríguez; o presidente da Federación Galega de Piragüismo e do representante provincial da Federación, Alfredo Bea e José Manuel Fernández; o adestrador do Club Fluvial Avión-Castrelo, Pedro Andrés García; e o representante da Secretaría Xeral para o Deporte, Manuel Pérez.

O presidente da Federación Galega de Piragüismo dixo que esta proba é "o pistoletazo da nova tempada 2019 do piragüismo galego e a antesala do campionato de España de Sevilla. En ningún lugar do mundo acontece o de Galicia, 40 clubs, preto de 500 deportistas só de categoría veterana, senior e xuvenil, e continuamos a traballar para traer máis actividade para Castrelo de Miño". De feito, Alfredo Bea adiantou que entre os proxectos futuros nos que se están a traballar atópase "atraer para o ano 2020 competicións internacionais", así como que para este ano "o piragüismo galego estea no Plan XOGAPE, para que este deporte estea nos colexios, por tratarse do deporte que máis medallas e éxitos aporta a Galicia".

Outro dos obxectivos da Federación Galega de Piragüismo é "abrir este deporte a toda a cidadanía para que todos poidan gozar do deporte, da terra, da paisaxe e da defensa do mesmo", sinalou Alfredo Bea, quen afirmou que "Galicia é piragüismo".

Pola súa parte, o alcalde de Castrelo de Miño agradeceu á Deputación de Ourense a súa colaboración e dixo que para o seu municipio é "unha satisfacción que non só o remo, senón tamén o piragüismo teña a súa casa no noso territorio, pois levamos tres anos consecutivos celebrando un Campionato Galego, e continuaremos a apostar para que Castrelo de Miño sexa referente dos deportes náuticos da provincia de Ourense".

O I "Cros de Antioquía", Campionato provincial de Campo a Través

• A Deputación de Ourense colabora con este evento deportivo que se disputará o día 24 de febreiro.

Ourense, 20 de febreiro de 2019.- O hipódromo de Antela acollerá o vindeiro domingo, 24 de febreiro, a primeira edición da proba atlética "Cros de Antioquía" que está incluída no calendario oficial da Federación Galega de Atletismo e será Campionato Provincial de Campo a Través absoluto, individual e por equipos. A presentación deste evento deportivo tivo lugar hoxe no Pazo Provincial, acto no que participou o vicepresidente da Deputación de Ourense, Rosendo Fernández; o concelleiro de Deportes de Xinzo de Limia, Luis Miguel Gil; o alcalde de Sandiás, Felipe Traveso; o delegado provincial da Federación Galega de Atletismo, �ngel Fidalgo; o xerente do Hipódromo de Antela, Jorge Vázquez; e o director deportivo da Asociación Deportiva Limiactiva, Óscar Gómez.

A Deputación de Ourense colabora con este evento deportivo que pretende converterse co tempo "nun dos mellores eventos atléticos do noroeste de España", sinalou Rosendo Fernández, quen felicitou á asociación Limiactiva por organizar esta actividade que "fomenta a práctica do deporte, dinamiza o territorio e contribúe a poñer en valor infraestruturas como o hipódromo de Antela".

O I "Cros de Antioquía",organizado pola Asociación Deportiva Limiactiva, contará con "preto de 200 participantes con carreiras para tódalas categorías, desde sub 10 ata absoluta, e comezará a partir das 10.30 horas, rematando coa categoría absoluta que será a máis numerosa", explicou Óscar Gómez. Os percorridos varían por categoría e van desde os 1.000 metros de distancia aos 6.000 metros. Os interesados en participar teñen de prazo para inscribirse ata mañá a través da páxina web www.carreirasgalegas.com.

Pola súa parte, o concelleiro de Deportes de Xinzo de Limia dixo que é un evento que nace "nunha datas moi significativas para a nosa terra, durante o Entroido, e nunhas instalacións magníficas para acoller unha proba de cros", e engadiu que "somos a capital do deporte como vila en moitas competicións e berce de bos atletas". Neste mesmo sentido, o alcalde de Sandiás dixo que desde o seu concello "sempre pretendemos fomentar o deporte e máxime cando se celebra no noso municipio" e convidou a todo o mundo a asistir a este evento do que "gozarán os participantes pero tamén o público".

Este primeira proba, "comezo dunha longa serie de cros, será a proba de fogo para comprobar as instalacións e o noso nivel organizativo, cunha carreira masculina moi numerosa con máis de 150 participantes co cal veremos como responde o terreo", sinalou �ngel Fidalgo. En canto ao hipódromo de Antela o seu xerente destacou a capacidade destas instalacións "porque o concepto de hipódromo a nivel nacional e internacional non só se dedican ás actividades ecuestres, senón que teñen que ter tamén unha acción social máis directa sobre toda a poboación e o de Antela recolle as condicións especiais para acoller este tipo de probas".

Manuel Baltar recibe a Carlos Mella

Ourense, 20 de febreiro de 2019.- O presidente da Deputación de Ourense, Manuel Baltar, recibiu hoxe no Pazo Provincial ao presidente da fundación Castelao, Carlos Mella, con que analizou temas referidos á vindeira chegada a Ourense do cadro A derradeira leición do mestre, obra icónica de Alfonso R. Castelao. Baltar e Mella concordaron na importancia e significación que para a provincia de Ourense terá o feito "de unir" a Rodolfo Prada e a Castelao nun mesmo espazo: a antiga biblioteca do Pazo Provincial, onde repousan temporalmente as cinsas do insigne galeguista ourensán dos Peares, Rodolfo Prada Chamochín, e a súa dona, Manuela Fraga.