A Deputación concede 229.000 euros en subvencións para cooperación cos concellos e actividades empresariais

Ourense, 21 de marzo de 2023.- A Xunta de Goberno da  Deputación de Ourense aprobou hoxe a concesión de preto de 229.000 euros en subvencións para cooperar en proxectos municipais e actividades empresariais.

Na sesión celebrada esta mañá, baixo a presidencia de Manuel Baltar, concedéronse 12.000 euros para o fomento de actividades turísticas e deportivas en Arnoia; 30.000 euros para equipamento da Escola de Baño en Bande; 40.000 para a segunda fase da piscina dos Blancos; case 48.000 para a mellora do camiño entre San Martiño e Barxa; 6.000 para o Concello do Carballiño con motivo da celebración do premio Antón Losada Diéguez; 18.000 para estudos e proxectos a realizar en Cortegada; e 25.000 euros a favor de Pereiro de Aguiar para Ben-Cho-Shey.

No ámbito de colaboración con entidades, a orde do día incluíu a aprobación dunha achega por importe de 50.000 euros para a Asociación Empresarial de Valdeorras (AEVA), axuda destinada á realización de proxectos e gastos de funcionamento correspondentes ao presente exercicio.

A Xunta de Goberno tamén ratificou unha resolución da presidencia pola que se deixa sen efecto a convocatoria de subvencións para o fomento de actividades escénicas e musicais de 2023. A decisión adóptase logo do esgotamento da partida orzamentaria prevista para esta liña de axudas -90.000 euros-, o que imposibilita a concesión de novas achegas.

A Deputación colaborará na mellora e mantemento dos cuarteis da Guardia Civil de Lobios e Lobeira

Manuel Baltar mantivo unha xuntanza no Pazo Provincial co xefe da Comandancia da Guardia Civil en Ourense, Rafael López, e o comandante Benito Fernández, para abordar esta nova liña de cooperación, que tomará forma nun convenio asinado coa Dirección Xeral da Guardia Civil

O convenio entre Deputación e Dirección Xeral da Guardia Civil renovarase cada ano e, como avanza o presidente, estará incluído no Plan de Mandato "2127"

O presidente da Deputación pon en valor "o traballo da Guardia Civil na vertebración e cohesión do noso rural: este corpo é unha potente ferramenta na loita contra a despoboación, ao ser un servizo básico de apoio aos veciños como demostra a súa altísima valoración social".

Manuel Baltar enmarca este investimento no "compromiso deste goberno provincial cos servizos públicos e a seguridade dos veciños dos 92 concellos ourensáns, con froitos como o peche do mapa de emerxencias ou o Consorcio provincial contra incendios"

"Seguimos avanzando nun camiño, o de blindar a atención ás emerxencias e a seguridade cidadá en todo o territorio provincial, que é fundamental na dinamización territorial, como vimos de reivindicar en Ourense na recente Conferencia Política da CEPLI", sinala o presidente do goberno provincial

Ourense, 20 de marzo de 2023.- O presidente da Deputación, Manuel Baltar, mantivo unha xuntanza no Pazo Provincial co xefe da Comandancia da Guardia Civil en Ourense, Rafael López, e o comandante da Guardia Civil Benito Fernández, para avanzar o compromiso do goberno provincial co acondicionamento e mantemento dos cuarteis de Lobios e Lobeira.

Manuel Baltar pon en valor a importancia deste investimento, que tomará forma nun convenio entre Deputación e Dirección Xeral da Guardia Civil, e remarca o "traballo da Guardia Civil na vertebración e cohesión do noso rural: este corpo é unha potente ferramenta na loita contra a despoboación, ao ser un servizo básico de apoio aos veciños como demostra a súa altísima valoración social".

O presidente da Deputación enmarca esta nova liña de colaboración coa Guardia Civil "no compromiso deste goberno provincial cos servizos públicos e a seguridade dos veciños dos 92 concellos ourensáns. Porque un ourensán, viva no municipio que viva, ten que ter ao seu carón ás administracións públicas e os servizos públicos".

Colaboración incluída no "Plan de Mandato 2127"

O convenio entre Deputación e Dirección Xeral da Guardia Civil, de renovación anual, segundo avanza o presidente do goberno provincial estará incluído no Plan de Mandato "2127" e nace co obxectivo de apoiar o "fundamental traballo" que realiza a Guardia Civil no rural ourensán.

Neste sentido, Manuel Baltar destaca a importancia de "seguir avanzando nun camiño, o de blindar a atención ás emerxencias e a seguridade cidadá en todo o territorio provincial, que é fundamental na loita contra a despoboación, como vimos de reivindicar en Ourense na recente Conferencia Política da Confederación Europea de Poderes Locais Intermedios".

O esforzo da Deputación neste eido tense traducido nos últimos anos en fitos como converter a Ourense na primeira provincia galega que pecha o seu mapa de emerxencias -con todos os concellos da provincia a menos de 30 minutos dun dos Grupos de Emerxencia Supramunicipal (GES) grazas ao novo convenio asinado coa Xunta de Galicia en 2022-; un traballo que se suma ao desenvolvido polo Consorcio Provincial contra Incendios e Salvamento, cos parques de bombeiros de Xinzo, Verín, Valdeorras e O Carballiño -que pasaron en febreiro deste ano ao modelo de xestión directa-; ou ao do parque de bombeiros xestionado directamente polo goberno provincial no Polígono de San Cibrao das Viñas.

"A Deputación culminou neste mandato un cambio de paradigma na xestión das emerxencias", resume Manuel Baltar, "reforzando a súa colaboración con todos os niveis da administración pública cun obxectivo moi claro e contundente: ofrecer, a través da colaboración, un servizo o máis eficiente posible co que dar unha resposta áxil e eficaz ante calquera incidencia que sucede na nosa provincia".

A Deputación colabora co 16º Salón de Prevención e Seguridade Laboral de Galicia

Este evento, que terá lugar en Expourense os días 22 e 23 de marzo, ofrecerá formación especializada en prevención e seguridade laboral impartida por expertos na materia a través dun programa de 30 actividades

O vicepresidente primeiro provincial, Rosendo Fernández, participou esta mañá no acto de presentación de Previsel, destacando "a importancia de apoiar este tipo de eventos desde a administración provincial, reunindo en Ourense a múltiples traballadores e empresas de Galicia e de fóra, e permitindo sensibilizar en materia de seguridade e prevención de riscos laborais"

Ourense, 20 de marzo de 2023.- O vicepresidente primeiro da Deputación, Rosendo Fernández, participou esta mañá na presentación do 16º Salón de Prevención e Seguridade Laboral de Galicia (Previsel), que terá lugar en Expourense os días 22 e 23 de marzo. Este evento, co que colabora a Deputación, ofrecerá formación especializada en prevención e seguridade laboral impartida por expertos na materia.

Ademais do vicepresidente provincial, o acto de presentación contou coa participación do delegado territorial da Xunta de Galicia en Ourense, Gabriel Alén; o xefe do Centro ISSGA de Ourense, �ngel López; o secretario xeral de Tesgalicia e a directiva de Tesgalicia, Uxío Figueroa e Beatriz Fernández respectivamente; e o director xerente de Expourense, Rogelio Martínez.

Rosendo Fernández destacou na súa intervención "a importancia de apoiar este tipo de eventos desde a administración provincial, reunindo en Ourense a múltiples traballadores e empresas de Galicia e de fóra, e permitindo sensibilizar en materia de seguridade e prevención de riscos laborais".

Programa de actividades

Grazas á colaboración da administración, patronal, sindicatos e servizos de emerxencias, esta edición de Previsel contará cun programa de 30 actividades, divididas entre a área de exposición e a das xornadas técnicas. Todas elas xirarán en torno aos eixos da prevención, saúde e seguridade laboral, engadindo nesta edición actividades sobre o acoso sexual e a igualdade de xénero, así como a prevención de trastornos músculo-esqueléticos.

Concretamente, durante as dúas xornadas realizaranse obradoiros e conferencias de primeiros auxilios, vixiancia da saúde dos traballadores, seguridade laboral en traballos de altura e no sector da construción e prevención de acoso sexual no eido laboral. Ademais, na parte expositiva do evento haberá diferentes postos con produtos de empresas especializadas na prevención de riscos laborais, e tamén se expoñerán equipamentos e vehículos vencellados coa prevención e as emerxencias, achegados por empresas ou entidades como a Deputación.

Todas estas actividades serán posibles grazas á presenza en Previsel 2023 de organizacións como a Consellería de Medio Rural, a Axencia de Emerxencias de Galicia, Cruz Vermella, Servizos de Emerxencias locais, sindicatos e representantes de diversas empresas e asociacións do sector da construción.

A asistencia a estas actividades é gratuíta e precisa de inscrición previa a través da web www.previsel.com ou no teléfono 988 36 60 30.

A Insua dos Poetas reunirá mañá a máis de 300 escolares no Día Mundial da Poesía e da �rbore

Os rapaces de centros de toda a comarca do Carballiño participarán nas actividades deseñadas en homenaxe a figuras senlleiras da poesía galega como Rosalía de Castro, Curros Enríquez, Lamas Carvajal e Eduardo Pondal

Ourense, 20 de marzo de 2023.- A Fundación Insua dos Poetas celebrará este martes 21 de marzo o Día Mundial da Poesía e da �rbore a través dun programa de actividades no que terán especial protagonismo os escolares da comarca do Carballiño. A xornada, que terá lugar no parque cultural A Esgueva (Madarnás, O Carballiño), conta co patrocinio da Deputación de Ourense e da Xunta de Galicia, así como a colaboración do Concello do Carballiño.

O Día Mundial da Poesía e da �rbore na Insua dos Poetas dará comezo ás 10,30 horas coa recepción dos centros escolares da contorna, que achegarán a este espazo cultural a máis de 300 alumnos. A continuación, o programa recolle varias actuacións musicais e as intervencións de Luís González Tosar, escritor e presidente da Fundación Insua dos Poetas; César Fernández, vicepresidente segundo da Deputación; Valentín García, secretario xeral de Política Lingüística; e Francisco Fumega, alcalde do Carballiño.

O  alumnado recitará poemas de Rosalía de Castro, Valentín Lamas Carvajal, Curros Enríquez e Eduardo Pondal, figuras centrais da poesía galega que quedarán inmortalizadas en catro novos murais que se irán estreando durante o transcurso da actividade e que ficarán expostos na Galería da Literatura Galega. Estas pezas artísticas son obra dos artistas Yoseba MP, Raquel Germade, Novenoel e Delio RC.

De cara ao remate do acto, realizarase unha interpretación do Himno de Galicia e os escolares plantarán diversas árbores autóctonas.

Iniciativa da Unesco celebrada na Insua dos Poetas dende 2012

O Día Mundial da Poesía é unha iniciativa da Unesco, impulsada en 1999, que se comezou a celebrar en todo o mundo a partir do 2000. Dende 2012, a Fundación Insua dos Poetas celebra na Insua dos Poetas cada 21 de marzo esta data, sempre co protagonismo do alumnado da comarca.

Nesta ocasión, a Insua dos Poetas acollerá ao alumnado dos seguintes centros de ensino públicos e privados da comarca: IES Nº1, IES Chamoso Lamas, Colexio Vila do Arenteiro, Colexio Sagrado Corazón, CEIP Calvo Sotelo, CEIP de San Amaro e CEIP do Irixo. Todos eles recibirán lotes de libros como agasallo.