O Xulgado tumba as pretensións do PSOE de Villarino de que autónomos e pemes tivesen que devolver as axudas da Deputación na pandemia

Manuel Baltar mantivo esta mañá un encontro coa presidenta da CEO, Marisol Nóvoa, e o presidente de AEPA Ourense, David Martínez, para dar conta da sentencia e lanzar "unha mensaxe de tranquilidade: a Xustiza avala unha actuación que perseguía inmediatez en axudar a un colectivo tan necesitado en momentos nos que facían falta todas as axudas"

"Recorrer estas axudas foi un caso único en Europa", sinala Manuel Baltar, que amosa a súa sorpresa por como o grupo socialista, liderado por Rafael R. Villarino, "foi quen de ir contra axudas directas outorgadas durante a pandemia e dirixidas a un colectivo conformado por milleiros de persoas que axudan a fornecer o tecido económico provincial"

Marisol Nóvoa amosa a súa ledicia por esta sentenza, "porque en caso dunha sentenza estimatoria do recurso, a parte prexudicada non sería a Deputación de Ourense senón os propios beneficiarios, que deberían devolver os cartos percibidos da que foi a primeira axuda na pandemia"

David Martínez valora a sentenza coma "unha boa noticia, sobre todo porque xa estamos bastante minguados os autónomos como para que a maiores teñamos que devolver unha axuda que pode supoñer novos custos"

Ourense, 30 de marzo de 2023.- O Tribunal Contencioso Administrativo ven de desestimar o recurso asinado  polos representantes do PSOE na Deputación, con Rafael Rodríguez Villarino á cabeza, contra as máis de 5.000 axudas directas destinadas polo goberno provincial aos autónomos e pequenas e medianas empresas de 91 concellos da provincia -todos menos os da capital- en maio e xuño de 2020, no peor da pandemia do covid-19.

O presidente da Deputación, Manuel Baltar, mantivo esta mañá no Pazo Provincial un encontro coa presidenta da Confederación de Empresarios de Ourense (CEO), Marisol Nóvoa, e o presidente da Asociación Empresarial de Profesionais e Autónomos (AEPA) de Ourense, David Martínez, para dar conta da sentencia e lanzar "unha mensaxe de tranquilidade: a Xustiza avala esa actuación da Deputación, a cal perseguía inmediatez en axudar a un colectivo tan necesitado en momentos nos que economicamente facían falta todas as axudas posibles".

Contra esta sentencia cabe recurso, explica Manuel Baltar, "e grupo socialista tomará agora a súa decisión. Pero o que está claro é que recorrer estas axudas foi un caso único en Europa. Ser capaces de ir contra axudas directas durante a pandemia, neste caso implementadas pola Deputación de Ourense, dirixidas a un colectivo conformado por milleiros de persoas que axudan a fornecer o tecido económico provincial".

A primeira institución provincial en habilitar este tipo de axudas

A Deputación foi a primeira institución provincial española en habilitar este tipo de axudas na primeira ola do covid. En total, o goberno provincial investiu 3.275.000 euros nesta liña de axudas, sendo beneficiarios os autónomos ourensáns -con máis de 4.400 solicitudes, percibiron 600 euros cada un- e pemes -case 700 solicitudes, cada empresa percibiu 760 euros-.

A sentenza avala o uso do procedemento de concorrencia non competitiva na liña de axudas aprobada pola Xunta de Goberno da Deputación o 8 de maio de 2020, fundamentada no seu momento para axudar a autónomos e pemes a sufragar gastos empresariais e profesionais que debían seguir afrontando na primeira ola do covid, incluso aínda con cese de actividade. E razoa que, en todo caso, o "procedemento de outorgamento da subvención en nada afectou ao resultado final da mesma, en tanto en cando todos os solicitantes foron beneficiarios e quedou crédito sobrante".

Presidenta da CEO: "A parte prexudicada non era a Deputación senón os propios beneficiarios, que en caso de sentenza estimatoria deberían devolver os cartos percibidos"

A presidenta da CEO, Marisol Nóvoa, amosou a súa ledicia por esta sentenza, "porque creo que este tema nunca debeu chegar ao xulgado, supuxo un dano moi grave para todas as empresas pequenas e para todos os empresarios". Incide Marisol Nóvoa na situación de "indefensión" dos beneficiarios neste caso específico, "ao poder, sen dúbida, persoarse no procedemento para defender os seus dereitos, pero cuns custes xudiciais que superaban o propio importe da axuda".

"No peor da pandemia, cando estabamos a sufrir unhas consecuencias nefastas para as empresas, os comercios e a poboación en xeral, esta foi a primeira axuda directa que houbo", lembra Marisol Nóvoa, "e por iso ao final, a parte prexudicada non sería a Deputación: en caso dunha sentenza estimatoria do recurso, os prexudicados serían os propios beneficiarios das axudas, que deberían devolver os cartos percibidos. Por iso espero que non haxa recursos".

O presidente da Asociación Empresarial de Profesionais e Autónomos (AEPA) de Ourense, David Martínez, considera esta sentenza "unha boa noticia, sobre todo porque xa estamos bastante minguados os autónomos como para que a maiores teñamos que devolver unha axuda que pode supoñer novos custos".

David Martínez agarda agora "que non se recorra esta sentenza e que, finalmente, este procedemento que foi moi benvido e agradecido por parte dos autónomos poida pecharse satisfactoriamente".

Manuel Baltar define a colaboración entre a Deputación e Sogarpo como "unha iniciativa innovadora para facer máis Ourense"

O presidente da Deputación recibiu esta mañá no Centro Cultural Marcos Valcárcel ao consello de administración da Sociedade de Garantía Recíproca da Pequena e Mediana Empresa de Pontevedra e Ourense, que encabezado polo seu presidente, Artur Yuste, escolleu a capital ourensá para manter unha das súas reunións habituais

Manuel Baltar puxo a Sogarpo como exemplo de colaboración público-privada, tanto pola participación da Deputación nesta sociedade como polo convenio asinado en días pasados "para achegar 500.000 euros desde a institución provincial ao financiamento de operacións que axilicen o crédito a pemes e autónomos da provincia"

Ourense, 30 de marzo de 2023.- O presidente da Deputación, Manuel Baltar, recibiu esta mañá no Centro Cultural Marcos Valcárcel ao consello de administración da Sociedade de Garantía Recíproca da Pequena e Mediana Empresa de Pontevedra e Ourense (Sogarpo), que encabezado polo seu presidente, Artur Yuste, escolleu a capital ourensá para manter unha das súas reunións habituais.

Manuel Baltar puxo a Sogarpo como exemplo de colaboración público-privada, tanto pola participación da Deputación nesta sociedade como polo convenio asinado en días pasados "para achegar 500.000 euros desde a institución provincial ao financiamento de operacións que axilicen o crédito a pemes e autónomos da provincia".

Para o presidente da Deputación está e "unha iniciativa innovadora para facer máis Ourense e que vai ter o seu impacto no tecido produtivo ourensán e axudará ao desenvolvemento económico do territorio". Unha aposta polo traballo conxunto que mereceu o recoñecemento de Manuel Baltar cara Sogarpo, "co que poñemos en marcha un novo instrumento de cooperación a través deste convenio", deixando as portas abertas "a outras iniciativas que poidan xurdir no futuro".

O convenio preséntase ao pleno ordinario de mañá

Precisamente o convenio asinado entre a Deputación de Ourense e Sogarpo figura na orde do día do pleno ordinario de marzo que a corporación provincial celebra mañá venres. O documento recolle unha liña de colaboración -que se renovará en 2024 con outros 500.000 euros-, polo que o goberno provincial bonificará as comisións e estudos dos avais outorgados ante as entidades de crédito e outros financiadores a favor de autónomos e pemes domiciliados na provincia de Ourense, ou que acrediten que os investimentos financiados con operación se realizan en territorio ourensán.

As axudas incluídas no convenio tratan de dar resposta ás necesidades de financiamento detectadas nas pemes e autonómos ourensáns, facilitando tres modalidades de axuda: préstamos avalados para o crecemento das pemes; operacións avaladas para o financiamento de tráfico comercial; e garantías ante terceiros vinculadas a operacións de tráfico ou avais técnicos.

A Deputación colaborará na prolongación da senda fluvial do río Badella en Bande

O goberno provincial, a Confederación Hidrográfica do Miño-Sil e o Concello de Bande asinaron esta mañá un convenio de colaboración

O proxecto, no que a Deputación colabora con 76.000 euros, tamén inclúe a limpeza do río e o tratamento silvícola da vexetación da ribeira fluvial

Ourense, 30 de marzo de 2023.- O presidente da Deputación, Manuel Baltar, asinou esta mañá un convenio de colaboración coa alcaldesa de Bande, Sandra Quintas, e o presidente da Confederación Hidrográfica Miño-Sil (CHMS), José Antonio Quiroga, para levar a cabo o proxecto de prolongación do acondicionamento da canle e marxes do río Badella ao seu paso polo núcleo urbano de Bande.

A inversión total necesaria para esta actuación será de 380.000 euros, dos que a Deputación de Ourense aportará 76.000 euros.

O proxecto recollido no convenio consiste na prolongación en 800 metros do sendeiro paralelo á canle do rio Badella, obra xa executada no 2014. Este novo acordo entre as tres administracións tamén inclúe a limpeza do río e o tratamento silvícola da vexetación da ribeira fluvial. Unha vez rematada a obra, o Concello de Bande pasará a ser o encargado da xestión, mantemento e conservación deste espazo natural.

A Peroxa organizará actividades infantís durante a Semana Santa

A iniciativa "Pascua na Peroxa", que conta coa colaboración da Deputación, celebrarase do 5 ao 9 de abril no Polideportivo Anxo Munín e terá como actividades estrela a pista de xeo sintético e as atraccións inchables

Ourense, 30 de marzo de 2023.- O vicepresidente da Deputación de Ourense, Rosendo Fernández, e o teniente alcalde da Peroxa, José Manuel Rodríguez, presentaron esta mañá no Pazo Provincial o programa de actividades infantís "Pascua na Peroxa", unha iniciativa destinada ao ocio dos máis cativos coa que colabora a Deputación de Ourense.

"Pascua na Peroxa" celebrarase do 5 ao 9 de abril no Polideportivo Anxo Munín e terá como actividades estrela a pista de xeo sintético e as atraccións inchables de grandes dimensións. Os cativos poderán participar nestas actividades en horario de mañá –de 12.00 a 14.00 horas– ou en horario de tarde –de 16.00 a 20.00 horas–. A participación será gratuíta para os nenos do concello, e terá un prezo de 5 euros para os visitantes, no que veñen incluídos os patíns para a pista de xeo.