Luz Doporto clausurou o XVIII Foro da Igualdade

Foro da Igualdade

Foro da Igualdade II

Ourense, 3 de xullo de 2022.- A deputada Luz Doporto clausurou esta mañá o XVIII Foro da Igualdade "Rompendo o teito de cristal", celebrado este fin de semana no Auditorio municipal de Verín.

As xornadas están organizadas pola Federación provincial de mulleres rurais de Ourense (Femuro) e este ano abordaron as violencias machistas de caracter estrutural, a través de sesións nas que mulleres compartirán o seu día a día en postos de poder en diferentes ámbitos. O domingo, ademais da participación de Doporto, tamén interviron mulleres coma a directora do grupo Leite Río, Carmen Lence, ou a propietaria de Rir&Co, Inés Rodríguez. 

 

O vicepresidente primeiro Rosendo Fernández asistiu á XXIX edición da Festa do Pan de Cea

Festa do Pan de Cea 3

Festa do Pan de Cea 2

Cea

Ourense, 3 de xullo de 2022.- O vicepresidente primeiro da Deputación, Rosendo Fernández, asistiu esta mañá no Campo da Saleta, en San Cristovo de Cea, á celebración da XXIX edición da Festa de Exaltación do Pan de Cea. Este evento gastronómico, que conta co respaldo da Deputación, tivo este ano como pregoeiro a Jose Manuel Vázquez Rodríguez, xefe de Cardioloxía do CHUAC.

Na Festa do Pan de Cea estiveron, entre outros, o presidente do Parlamento de Galicia, Miguel Santalices; o conselleiro de Medio Rural, José González; o delegado da Xunta en Ourense, Gabriel Alén; a directora de Turismo de Galicia, Nava Castro; o alcalde de San Cristovo de Cea, José Luis Valladares; e o presidente da IXP Pan de Cea, Carlos Rodríguez. 

A Deputación colabora na celebración da II edición do Espírito Ribeiro

Reunion de Manuel Baltar co alcalde de Castrelo de Mino

O presidente do goberno provincial, Manuel Baltar, reuniuse co alcalde de Castrelo de Miño, Avelino Pazos, e avanzou a colaboración con este festival, que se celebrará o 19, 20 e 21 de agosto en este concello, Arnoia e Cenlle

Ourense, 3 de xullo de 2022.- O presidente da Deputación, Manuel Baltar, mantivo unha reunión de traballo no Pazo Provincial co alcalde de Castrelo de Miño, Avelino Pazos, para analizar as liñas de colaboración abertas entre ambas administracións e perfilar novas iniciativas de cooperación nos próximos meses.

O presidente do goberno provincial comprometeu o apoio da Deputación de Ourense á celebración da II edición do Espírito Ribeiro, que se celebrará os días 19, 20 e 21 de agosto en Arnoia, Castrelo de Miño e Cenlle, e que tamén conta coa colaboración da Xunta de Galicia e a Denominación de Orixe Ribeiro.

O alcalde de Castrelo, Avelino Pazos, agradeceu o "apoio da Deputación, sempre disposta a respaldar os proxectos que presentamos os concellos". O rexedor tamén destacou a "colaboración e cooperación con dos concellos irmáns, como son Arnoia e Cenlle, que xa o ano pasado cando lle propuximos a idea aceptaron no momento para promocionar o viño da DO Ribeiro, os produtos de proximidade e a promoción da nosa comarca, todo elo aderezado con boa música e actividades culturais".

Avelino Pazos resalta que o festival Espírito Ribeiro está deseñado en "clave comarca" e destaca o potencial deste evento, "o ano pasado foi un verdadeiro éxito", e que completa un agosto no que Castrelo de Miño tamén acollerá a Coupe de la Jeunesse e a Festa da Anguía.

Tres días de actividades

Espírito Ribeiro pivota sobre tres días de actividades en puntos clave de Arnoia -19 de agosto-, Castrelo de Miño -20 de agosto- e Cenlle -21 de agosto- arredor do río Miño, as augas termais, o deporte náutico e os produtos de proximidades. Entre as posibilidades de ocio, apunta o rexedor, os visitantes tamén poderán reservar praza no catamarán.

Segundo explican dende os concellos participantes, a proposta foi creada "a medida da proxección das terras do Ribeiro a través do seu produto máis xenuíno, o viño DO Ribeiro" e está concibida para "funcionar como panca da economía da comarca, nun momento clave en que se fai necesario repensar o turismo, promocionar o local e o valor engadido".

A programación abarca concertos, degustacións gastronómicas, "showcookings", deporte náutico, termalismo e charlas de representantes do mundo da enoloxía, o turismo e a cultura. "Unha proposta pensada para difundir a riqueza cultural e histórica en que se arraiga un viño milenario, que foi conformando durante décadas a paisaxe natural e cultural dunha comarca única".

A Deputación prepara un proxecto para crear unha plataforma turística baseada na Intelixencia Artificial

Reunion de Manuel Baltar e Fernando Suarez

O plan deseñado pola área de Transparencia e Goberno Aberto aspira a captar fondos europeos co obxectivo de mellorar a experiencia do visitante e potenciar a dixitalización do sector turístico ourensán

O programa inclúe activar un auxiliar de conversa, unha oficina de turismo virtual, un centro turístico integral baseado na Intelixencia Artificial e unha plataforma de intelixencia contextual

O presidente da Deputación, Manuel Baltar, resalta as posibilidades dun proxecto que "potencia as potencialidades turísticas de Ourense" e o enmarca dentro dos traballos para impulsar o Destino Turístico Intelixente

Ourense, 2 de xullo de 2022.- A Deputación perfila un proxecto de creación dunha plataforma baseada en Intelixencia Artificial (IA) para apoiar ó turismo na provincia de Ourense. O goberno provincial, a través da área de Transparencia e Goberno Aberto, presentou o plan á convocatoria de fondos europeos para a transformación dixital e modernización das entidades locais da Rede de Destinos Turísticos Intelixentes (DTI), da que forma parte a propia Deputación.

O principal obxectivo deste proxecto, que se levaría a cabo entre setembro deste ano e 2023, é a creación da mencionada plataforma para apoiar aos turistas da provincia e facilitar os trámites que realizan os usuarios cando queiran pasar as súas vacacións en Ourense. O programa inclúe activar un auxiliar de conversa, unha oficina de turismo virtual, un centro turístico integral baseado na Intelixencia Artificial e unha plataforma de intelixencia contextual.

O presidente da Deputación, Manuel Baltar, reuniuse no Pazo Provincial co director da Área de Transparencia e Goberno Aberto, Fernando Suárez, para abordar dos detalles do proxecto. Baltar resalta o traballo desta área -"que nos axuda a situarnos á vangarda dos gobernos provinciais de España"- e destaca as posibilidades deste plan, "pensado para o visitante e tamén para apoiar ó sector turístico ourensán, favorecendo as conexións e potenciando as capacidades da nosa provincia, a mellor conectada de Galicia e que ten unha enorme riqueza termal, patrimonial, natural e enogastronómica".

Manuel Baltar enmarca este programa dentro de todo o traballo realizado para impulsar o Destino Turístico Intelixente: "O que estamos a facer é poñer a disposición do visitante todas as ferramentas para que a súa estadía e experiencia en Ourense sexan inesquecibles".

Nesta liña, o proxecto pretende mellorar a experiencia do viaxeiro facendo uso de tecnoloxías innovadoras. Ademais, repercutirá no grao de dixitalización do sector turístico ourensán grazas ao desenvolvemento dun sistema de intelixencia turística para as administracións públicas e empresas do sector, onde se recollen datos das propias empresas e organizacións de toda a cadea de valor, así como investir en proxectos e iniciativas innovadoras que impliquen solucións dixitais para o sector, como o desenvolvemento de aplicacións ou plataformas colaborativas.

Un proxecto de apoio ó turismo composto por catro accións

O primeiro elemento do proxecto é a presenza dun auxiliar de conversa capaz de comunicarse cos cidadáns, en galego e castelán, tanto por voz como por texto, e que lles permitirá consultar información turística de interese e tomar decisións en función dos datos proporcionados.

Dentro do proxecto tamén haberá unha oficina de turismo virtual a través dun espazo virtual accesible nunha páxina web, no que o turista poderá desprazarse para consultar as seccións e espazos que compoñen esta oficina. Deste xeito, o turista poderá acceder a toda a información que precise para as vacacións, como rutas, restaurantes, hoteis ou reservas de servizos.

Outro dos servizos integrados na plataforma é o deseño dun centro turístico integral dotado de intelixencia artificial. Este sistema está deseñado para un entorno de traballo con diversos sistemas de xestión de datos, polo que será necesario un único entorno para ser operado por un gran número de usuarios con diferentes configuracións e niveis de acceso. Ademais, esta parte do proxecto proponse coma un completo sistema de visualización, totalmente configurable, que funciona como integrador de sistemas de información e plataformas de servizos.

Finalmente, grazas ao proxecto existirá unha plataforma de Intelixencia Artificial Contextual para o DTI, que poderá interpretar o contexto preciso no que se atopa o viaxeiro, os seus intereses e preferencias para poder satisfacer as necesidades expresadas ou anticipar e recomendar preditivamente aquelas posibilidades que poidan ser do seu agrado.

Usar as tecnoloxías da información para mellorar a experiencia turística antes, durante e despois da visita a Ourense

O director da Área de Transparencia e Goberno Aberto, Fernando Suárez, sinala que este proxecto basease na "intelixencia contextual" para poder "aportar as solucións máis útiles": "Posibilitamos unha representación dixital máis ambiental, interactiva e preditiva do DTI".

En definitiva, resume Fernando Suárez, "trátase de utilizar as tecnoloxías da información máis vangardistas, como a IA, o 'big data' ou a Internet das cousas, para mellorar a experiencia turística antes, durante e despois da visita. Tamén se mellora a a percepción do viaxeiro, facilitando o coñecemento dos recursos turísticos -natureza, viño, patrimonio...- en función do perfil do viaxeiro e de como planifica a súa viaxe -en familia, só, en coche...-, ademais de habilitar sistemas. que permitan medir e comprobar o grao de satisfacción para poder utilizar estas medidas para a mellora continua".

A vantaxe dos sistemas propostos é que son intuitivos e accesibles. Deste xeito, conséguese unha interacción máis amigable co usuario, por exemplo cun sistema de conversación ou cunha oficina virtual que prestará un servizo de xeito ininterrompido, mellorando a percepción do proxecto Destino Turístico Intelixente.

Tamén se facilitará a navegación pola web e a busca de recursos a través de sistemas visuais con recursos en toda a provincia, permitindo unha maior facilidade para acceder e coñecer a variedade de posibilidades turísticas dos concellos da provincia.