Luar Na Lubre presentará en Ourense, coa colaboración da Deputación, o seu último traballo "Vieiras e vieiros, historias de peregrinos"

• O grupo protagonizará un dobre concerto os días 14 e 15 de xaneiro, no Teatro Principal, no que amosará ao público este disco que recolle historias e lendas dos peregrinos na ruta xacobea por terras galegas.
• 
  
• Manuel Baltar destacou que estes concertos celebraranse grazas a esa "andaina de colaboración que levamos a manter desde hai tempo e que xa fixera posible que un dos seus traballos homenaxeara á Ribeira Sacra cun disco que foi ideado e gravado na nosa provincia".
• 
  
• Ademais, este álbum número 19 da formación galega conta coa colaboración especial do cantante Miguel Ríos, quen interpreta en galego o tema "Benvido".

Ourense, 10 de xaneiro de 2022.- O grupo Luar Na Lubre comezará a súa xira de concertos deste ano cunha dobre actuación no Teatro Principal, os días 14 e 15 de xaneiro, en colaboración coa Deputación de Ourense, para presentar en Ourense o seu novo traballo "Vieiras e vieiros, historias de peregrinos", un álbum que levan a promocionar desde o ano 2020 e que recolle historias e lendas dos peregrinos que percorreron os diferentes camiños que levaban a Santiago, así como as súas derivacións ata Fisterra e Muxía, nos confíns da terra.

O presidente da Deputación de Ourense, Manuel Baltar, presentou na sala de prensa do Pazo Provincial xunto aos integrantes do grupo Bieito Romero e Xavier Ferreiro, o comezo da xira deste ano de Luar Na Lubre que terá lugar en Ourense. Baltar lembrou que se trata da "banda máis internacional de Galicia que leva máis de 30 anos compoñendo e interpretando temas tan característicos e enraizados na nosa cultura".

O seu último traballo, o número 19, será presentado en Ourense grazas a esa "andaina de colaboración que levamos a manter desde hai tempo e que xa fixera posible que un dos seus traballos homenaxeara á Ribeira Sacra cun disco ideado e gravado na nosa provincia", destacou o presidente da Deputación de Ourense. Nesta ocasión, este último traballo tamén homenaxea a un dos grandes símbolos identitarios de Galicia como é o Camiño de Santiago", engadiu Baltar.

O presidente do goberno provincial destacou o gran labor de investigación musical desta banda galega e "a súa chegada ao gran público, así como a súa pegada do seu compromiso coa música e coa cultural, innovando e deixando sempre quedar o pavillón de Galicia ao máis alto nivel en todas as partes do mundo".

Durante esta primeira comparecencia do ano 2022, o presidente do goberno provincial lembrou a José Antonio Viñas, "un dos grandes da cultura de Ourense que nos deixou nestas datas. Un namorado e un precursor do folclore, das nosas costumes e tradicións e que sempre ficará con nós, polo seu compromiso coa cultura e pola súa identificación coa terra, e por esa pegada que deixou en "Queixumes dos Pinos" a través da súa contribución con moitas asociacións culturais da provincia que fai que o teñamos sempre presente", salientou Manuel Baltar.

O grupo internacional de folk en Galicia pon a banda sonora ao Camiño de Santiago, a través dos 27 temas que conforman este traballo, que mestura as creacións propias, con sonoridades das sendas e lugares do itinerario xacobeo, coma o son dun temporal, os ríos, o vento, as aves rapaces, as campás en Cebreiros ou unha misa en Muxía.

As entradas para asistir a estes concertos, que comezan ás 20.30 horas, pódense adquirir na web:https://entradas.ataquilla.com/ventaentradas/es/otras-musicas/teatro-principal-de-ourense/13100--luar-na-lubre-vieras-e-vieiros-historias-de-peregrinos.html e no punto de venda do Teatro Principal de Ourense (rúa da Paz, 9), unha hora antes do inicio da actuación.

O novo disco con Miguel Ríos

O novo disco de Luar Na Lubre "Vieiras e vieiros, historias de peregrinos", o álbum número 19 da formación galega, conta coa colaboración especial "dun dos grandes da música en España como é Miguel Ríos, interpretando o primeiro tema titulado "Benvido", na liña do que xa fixeron no anterior traballo co gravado na Ribeira Sacra, no que tamén participou Víctor Manuel", destacou o presidente da Deputación de Ourense.

O disco recolle ademais o tema 'Dum Pater familias', o canto máis antigo de peregrinos a Compostela, que aparece recollido no Códice Calixtino, e 'Martiros e o vákner' recupera unha das lendas vinculadas ao final do Camiño de Santiago, nas terras de Muxía e Fisterra, que se inspira na viaxe que o bispo armenio Mártiros de Arzendjan realizou, no século XV, a Compostela. Durante o seu percorrido, despois de recibir a bendición do apóstolo en Santiago, o armenio encontrouse, nos montes de Dumbría, cunha besta maligna e de gran tamaño, á que chamou vákner.

Este traballo tamén recupera a lenda de Dugium, a cidade anegada, ao tempo que achega algunhas das sonoridades propias da ruta xacobea, como son os corvos da Ulloa ou as gaivotas do mar de Fisterra.

"Vieiras e vieiros, historias de peregrinos" inclúe un segundo disco que recompila algúns dos temas de Luar Na Lubre vinculados á ruta xacobea. "A nosa creación é moi propia e persoal, pero está moi relacionada coas músicas tradicionais e, especialmente, coa lírica galega medieval", expón Bieito Romero. O segundo CD inclúe cantigas que Luar Na Lubre adaptou ao seu estilo ao longo da súa traxectoria e cancións coas colaboracións de Diana Navarro, Ismael Serrano, Pablo Milanés, Miro Casabella, Orquesta Sinfónica de Bratislava y Carlos Jean.

"As historias do Camiño e o seu factor humano son elementos dun patrimonio que debemos mostrar e por en valor. Queremos reflexar e dar a coñecer, dende unha nova perspectiva, o valor do noso patrimonio inmaterial", sinala o músico. Deste modo, Luar Na Lubre rende homenaxe á labor de figuras como Don Elías Valiña, párroco, no seu momento en O Cebreiro, porta de entrada do Camiño en Galicia e recuperador fundamental do Camiño moderno.

O proxecto musical de Luar Na Lubre, na súa recoñecida traxectoria de máis de 35 anos, baséase fundamentalmente nas músicas de raíces galegas, polo que dedican particular atención ao estudo dos principais cancioneiros galegos, así como o traballo de campo que lles proporciona un profundo coñecemento sobre a realidade musical galega que se vén revelado determinante nas súas propias composicións.

O grupo está formado por Bieito Romero (gaitas, acordeón, zanfoña), Irma Macías (voz), Nuria Naya (violín), Patxi Bermúdez (bodhran, tambor), Pedro Valero (guitarra acústica), Xavier Ferreiro (percusión latina, efectos), Xan Cerqueiro (frautas) e Brais Maceiras (acordeón).

Luar Na Lubre, que significa o 'resplandor da lúa no lugar sagrado dos celtas', fundouse hai máis de 30 anos na Coruña coa vocación de desenvolver e dar a coñecer a música e a cultura galega. Cun repertorio baseado fundamentalmente en músicas de raíces galegas, é actualmente a banda máis internacional de Galicia que actuou ante o público dende Palestina ata Canadá e dende Alemaña a Arxentina.

Un proxecto da Deputación para a transformación do comercio rural obtén a máxima puntuación en toda España na convocatoria dos fondos Next Generation

• O presidente provincial, Manuel Baltar, cualificou de "excelente noticia" a avaliación do programa, nunha demostración "da planificación e anticipación coa que traballa este goberno", lembrando que, en xullo do pasado ano "fomos a primeira provincia española en pór en marcha un plan específico para atraer fondos europeos e nos que o reto demográfico e a innovación figuraban entre os sete eixos de traballo"

• O proxecto CROu, que obtivo a mellor cualificación de entre 312 programas presentados, oriéntase á transformación dixital e sustentabilidade do comercio rural en 18 concellos das comarcas de Celanova, Trives e Vana

Ourense, 5 de xaneiro de 2022.- O proxecto de dixitalización e sustentabilidade do comercio rural (CROu) deseñado pola Deputación de Ourense vén de obter a máxima puntuación de toda España na convocatoria dos fondos Next Generation do Plan de Recuperación, Transformación e Resiliencia xestionado polo Ministerio de Industria, Turismo e Comercio. Un plan que involucra a 18 concellos da provincia e que aposta pola actividade comercial en zonas de reto demográfico, facilitando o acceso a novos canais de comercialización e procurando un papel activo dos empresarios do sector na educación dixital dos seus clientes, que na meirande parte dos casos son persoas de avanzada idade.

O presidente provincial, Manuel Baltar, cualificou de "excelente noticia" a avaliación do proxecto CROu nunha convocatoria á que se presentaron 312 proxectos de administracións locais e provinciais de toda España. "Unha demostración -dixo- da planificación e anticipación coa que traballa este goberno", lembrando que xa en xullo do pasado ano "fomos a primeira provincia española en pór en marcha un plan específico para atraer fondos europeos, con proxectos valorados en 85 millóns de euros e nos que o reto demográfico e a innovación figuraban entre os sete eixos de traballo".

Manuel Baltar subliñou "o importante e rigoroso" traballo que está a desenvolver a Deputación de Ourense na captación de fondos europeos, "que permitiu levar a cabo programas como o recen finalizado Raia Termal, o EmprendOU aínda en marcha ou a iniciativa "Ourense, destino turístico intelixente", proxecto no que fomos unha das catro provincias de España que conseguiu financiamento comunitario para esta iniciativa de turismo á carta, especialmente importante agora que xa chegou o AVE".

O proxecto CROu contará cun orzamento de preto de 260.000 euros cofinanciados nun 70 % polos fondos europeos e comezará a executarse en febreiro, estendéndose ao longo deste ano. Aplicarase en concellos das comarcas de Celanova (A Bola, Cartelle, Celanova, Gomesende, A Merca, Padrenda, Pontedeva, Quintela de Leirado, Ramirás e Verea); Trives (Chandrexa de Queixa, Manzaneda, Pobra de Trives e San Xoán de Río); e Viana (A Gudiña, A Mezquita, Viana do Bolo e Vilariño de Conso). As máis de 400 actividades comerciais nestes 18 concellos (Datos do IGE de 2019) poderán beneficiarse dunha ou varias accións previstas no programa.

CROu procura a transformación dixital do comercio rural, que pretende manter aos clientes fidelizados a través da compra presencial, ofertándolles unha canle dixital como elemento complementario sen perder as vantaxes e oportunidades do comercio local, como o acceso ao produto de quilómetro 0 ou a proximidade e atención directa. Trátase dun proceso basicamente orientado ao consumidor local, pero que tamén permitirá a determinados perfís de comercio rural abrirse a novos mercados, expandirse e mesmo optimizar o seu stock. Ademais facilitará a colaboración entre comercios de diferentes concellos, demostrando ao cliente que comprar en local é posible, é fácil e adaptativo.

CROu poñerá igualmente ao servizo do comercio ambulante, de grandísima repercusión e importancia no ámbito local, o acceso a novas posibilidades tecnolóxicas. Deixar á marxe a este subsector poría en perigo a súa actividade e, en consecuencia, deixaría a áreas rurais sen a única oferta física de acceso ao produto. O obxectivo é dar continuidade a un tipo de comercio moi asentado socialmente e, quizá, un dos principais afectados polos novos hábitos de consumo.

Para contribuír aos obxectivos de transformación dixital e sustentabilidade local, o proxecto poñerá ao dispor dos comercios un soporte de venda online para ter os seus produtos aloxados nunha canle dixital común, poder comprar en varias tendas e realizar un único pago, asegurándose un vía de entrega do produto eficaz e solvente, incrementando ao mesmo tempo a colaboración entre os empresarios. Ademais configuraranse tres áreas, unha por comarca, para implantar "Despachos de billetes Intelixentes" ou Espazos TI, onde o consumidor poderá retirar a súa compra no horario que mellor se lle adapte, a través dunha clave que lle enviará o comercio e nun sistema aberto as 24 horas do día.

Polo que respecta os obxectivos de sustentabilidade ambiental, dotarase aos comercios de dous novos contedores no que almacenar temporalmente e de maneira selectiva embalaxes e envases de papel ou cartón. Así, o establecemento poderá acumular un volume determinado dos seus residuos antes de levalos ao contedor de proximidade do servizo público de recollida de residuos sólidos urbanos. O proxecto complétase con campañas formativas, de promoción e de sensibilización dixital e ambiental.

A Deputación desenvolve un proxecto piloto con inhibidores de fauna para reducir accidentes con animais salvaxes nas estradas provinciais

• O plan afectará a preto de 500 quilómetros de oito vías nas que se rexistra un maior número de sinistros e se executará mediante a aplicación de substancias repelentes e sistemas disuasorios por ultrasóns

• O presidente provincial, Manuel Baltar, explicou que o proxecto xurdiu dun estudo sobre a sinistralidade nas estradas provinciais como consecuencia do atropelo de animais salvaxes, que se suma, engadiu, "aos programas de sinalización que vimos desenvolvendo nos tramos máis perigosos para garantir a seguridade viaria"

Ourense, 5 de xaneiro de 2022.- A Deputación de Ourense, a través da �rea de Infraestruturas, está a desenvolver un proxecto piloto coa instalación de inhibidores de fauna nas estradas da rede provincial, co obxectivo de reducir o número de accidentes de tráfico provocados pola irrupción de animais salvaxes na calzada. O plan afectará a preto de 500 quilómetros de oito vías provinciais nas que se rexistra un maior número de accidentes e se executará mediante a aplicación de substancias repelentes e sistemas disuasorios por ultrasonidos.

O presidente provincial, Manuel Baltar, explicou que o proxecto piloto xurdiu dun estudo sobre a sinistralidade nas estradas provinciais como consecuencia do atropelo de animais salvaxes, cuxos resultados evidenciaron que se estaba a producir un incremento no número de incidentes. Desde hai anos, engadiu, "vimos desenvolvendo programas de sinalización nos tramos máis perigosos para garantir a seguridade viaria advertindo aos condutores da presenza de animais". Non obstante, e ante o constatado aumento da fauna salvaxe "estudamos a implantación de novas medidas que evitasen a proximidade dos animais ás estradas, decidíndonos a probar a instalación de inhibidores".

A rede de estradas da Deputación de Ourense ten unha extensión de 1.850 quilómetros, dos que a gran maioría discorren por áreas rurais, razón pola que entre os accidentes de tráfico máis números figuran os atropelos de fauna salvaxe, na súa meirande parte xabarís e corzos. Así, na relación de vías provinciais máis afectadas figuran un total de 14 tramos que entre 2015 e 2020 acumularon preto de 500 sinistros.

Cun orzamento de case 50.000 euros e durante un período experimental dun ano, os inhibidores colocaranse ao longo de preto de cincocentos quilómetros de vías provinciais que discorren por catorce concellos: Celanova, Quintela de Leirado, Vilar de Barrio, Baños de Molgas, Trasmiras, Sarreaus, Xinzo de Limia, Cualedro, Calvos de Randín, Os Blancos, Bande, Lobeira, Lobios e Entrimo.

Dous son os sistemas elixidos. O que máis se empregará será a aplicación de substancias repelentes como feromonas de depredadores destes animais utilizándoos como elemento disuasorio oloroso. Un "ambientador natural" que quedará impregnando en árbores, pedras ou mallas de cerramento e cun forte cheiro que escorrenta aos animais. O segundo sistema, que será o minoritario, correspóndese coa colocación de inhibidores por radiofrecuencia nas marxes da estrada, situados en postes de menos dun metro de altura, que emiten un sinal acústico que tamén evita a proximidade dos animais á estada.

De resultar efectiva, esta experiencia estenderíase a todos aqueles tramos de vías provinciais onde haxa un maior número de sinistros destas características.

A Deputación participa nun plan de identificación transfronteirizo para facilitar á cidadanía e empresas da UE o acceso a servizos públicos dixitais

• A iniciativa, que se enmarca no programa "Conectar Europa", suporá "un paso máis nesa vocación que temos pola tecnoloxía e a innovación, que sustentan a nosa política de accesibilidade electrónica a todas as xestións que necesitan os cidadáns, estendendo agora este proceso aos residentes nos países da nosa contorna", destacou o presidente provincial Manuel Baltar

Ourense, 4 de xaneiro de 2022.- A Deputación de Ourense, a través da �rea de Transparencia e Goberno Aberto, participa nun programa de identificación electrónica transfronteiriza, o proxecto "eID4Spain20", que ten como obxectivo facilitar a toda a cidadanía e ás empresas da Unión Europea o acceso aos servizos públicos dixitais que ofrece a institución provincial. "Un novo exemplo do noso absoluto compromiso co desenvolvemento e aplicación das novas tecnoloxías para axilizar as relacións coas administracións, incrementar a calidade de vida das persoas e abordar un reto fundamental como é a redución da fenda dixital", afirmou o presidente provincial Manuel Baltar.

O programa vai supoñer, engadiu, "un paso máis nesa vocación que temos pola tecnoloxía e a innovación, que sustentan a nosa política de accesibilidade electrónica a todas as xestións que necesitan os cidadáns, estendendo agora este proceso aos residentes nos países da nosa contorna". Este proxecto, lembrou, súmase ás últimas iniciativas postas en marcha polo goberno provincial, "como o plan de innovación "5G-allaecia" para impulsar a implantación desta tecnoloxía na provincia e no norte de Portugal, ou o compromiso adquirido como presidente no debate do estado da provincia para implantar un sistema de atención cidadá mediante vídeochamada, con capacidade para realizar consultas e trámites de forma telemática, avanzando na administración dixital con oficinas de información máis innovadoras e eficaces".

Dado que o primeiro requisito para acceder a unha sede electrónica é a identificación do usuario, a Deputación está a traballar na progresiva actualización de todos os trámites que se poden realizar telemáticamente, de tal xeito que tanto os cidadáns como as empresas da Unión Europea podan utilizar a súa identificación electrónica nacional.

O proxecto, coordinado pola Universidade de Valencia e no que tamén participan o concello valenciano de Torrente e o madrileño de Alcobendas, procura garantir a mobilidade transfronteiriza mediante o apoio e reforzo do mercado único dixital, facilitando a participación das persoas, empresas e colectivos noutros territorios da contorna, ademais de axustarse ás políticas, estratexias e actividades a nivel europeo nacional en materia de identificación electrónica.

A iniciativa, cun orzamento de máis de 100.000 euros cofinanciados ao 75 % polo programa "Conectar Europa", ten unha duración de 18 meses e suporá para os participantes e os seus beneficiarios un paso máis na política de accesibilidade electrónica a todas as xestións que necesiten os cidadáns europeos.