Deputación, consellos reguladores e unha corporación americana estudan a exportación de viño ourensán a Estados Unidos

 

Ourense, 22 de febreiro de 2017.- O presidente da Deputación de Ourense, os consellos reguladores das denominacións de orixe vitivinícolas ourensás e o directivo da corporación americana “International Spirits and Wines” celebraron esta tarde no Pazo Provincial unha reunión para analizar as posibilidades de exportación de viño ourensán a Estados Unidos.

 

Na reunión participaron Manuel Baltar, os representantes dos consellos reguladores do Ribeiro, Valdeorras, Monterrei e Ribeira Sacra, Felicísimo Pereira, Francisco García, José Antonio Dasilva e Marta Villén; o xerente do Inorde, José Manuel Rodríguez, e Glenn Albright, directivo da empresa agroalimentaria estadounidense. O presidente do goberno provincial dixo que esta importante canle de comunicación empresarial “establécese como consecuencia da misión comercial USA-Ourense, celebrada en xuño de 2016, contacto ao que prestaremos a nosa colaboración en favor do sector do viño en Ourense, facendo o seguimento desta porta comercial que hoxe abrimos”.

 

Baltar expresou que os resultados da misión comercial USA-Ourense “estanse a ver con certa regularidade, e hoxe cristaliza un importante achegamento entre unha destacada corporación agroalimentaria de Estados Unidos e un sector estratéxico da nosa economía provincial como é o vitivinícola”, remarcando que Glenn Albright “coñece as especificidades e a calidade dos viños das denominacións de orixe ourensás, testou os nosos caldos e visitou adegas de cada consello regulador, e na reunión de hoxe a Deputación de Ourense pon a disposición do sector do viño unha canle de comercialización directa cun mercado tan potente como o estadounidense”.

 

Manuel Baltar afirmou que o papel da Deputación de Ourense, neste caso, “é xerar posibilidades e espazos que faciliten a distribución dos nosos produtos de calidade para que agora, as empresas vitivinícolas da nosa provincia, co liderado dos consellos reguladores, estuden as propostas de comercialización para abrir unha posibilidade enorme para o potencial deste sector na provincia de Ourense”.

 

Baltar saúda “moi positivamente” a reunión celebrada hoxe entre Glenn Albright e os representantes dos consellos reguladores, “e a partires de agora estaremos moi atentos ao desenvolvemento dos seguintes pasos, para apoiar institucionalmente todo o que sexa posible desde a Deputación de Ourense”. 

 

Pola súa parte, Glenn Albright presentou aos consellos reguladores o proxecto comercial que a súa corporación desenvolve, dirixido a consumidores que buscan experiencias vitivinícolas de territorios diferentes aos xa coñecidos no mercado USA. Actualmente, “International Spirits and Wines” importa viños de prestixio de países como Chile, Francia, Italia, Arxentina, Portugal, México e tamén comercializa caldos de Estados Unidos. A compañía ten a súa sé en Nova York e traballa no mercado de distribución de bebidas espirituosas e viños de alta calidade desde o ano 2008.

 

Albright, quen visitou estes días adegas das catro denominacións de orixe ourensás, afirma que a súa intención “é desenvolver unha plataforma para os viños de Ourense, e teño que agradecer a Manuel Baltar porque o seu labor fixo que eu me implicase neste proxecto, xa que toda esta iniciativa comezou na misión comercia USA-Ourense de 2016, e agardo que de aquí xurdan oportunidades de negocio”.