Subvencions-Covid19-autonomos
I. Información xeral sobre as subvencións a traballadores autónomos acollidos ao cesamento de actividade polo COVID 19:
¿Quen pode obter a subvención?
As persoas físicas que sexan traballadores autónomos e cumpran os seguintes requisitos:
a) Exercer a súa actividade económica en calquera municipio da provincia de Ourense de menos de 20.000 habitantes. Para estes efectos, tomarase como referencia o domicilio da actividade económica que figure na matrícula do Imposto de Actividades Económicas.
b) Estar dados de alta no Réxime Especial de Traballadores Autónomos ou no Sistema Especial de Traballadores por Conta Propia Agrarios. Entenderanse incluídos todos os traballadores aos que se refire o artigo 1 da Lei 20/2007 de 11 de xullo, do estatuto do traballo autónomo. Exclúense os autónomos colaboradores a que se refire o artigo 1.1., parágrafo 2º da citada lei.
c) Figurar dados de alta na matrícula do IAE, xa sexa o propio autónomo como persoa física ou a persoa xurídica ou entidade sen personalidade que exerza a actividade e á que o autónomo figure vinculado.
d) Ter recoñecida a prestación extraordinaria por cesamento de actividade prevista no artigo 17 do Real decreto lei 8/2020, do 17 de marzo, de medidas urxentes extraordinarias para facerlle fronte ao impacto económico e social do COVID 19.
Non obstante o anterior, poderán obter igualmente a subvención os traballadores autónomos que non puideron acollerse ao cese extraordinario de actividade por atoparse en situación de incapacidade temporal ou baixa por maternidade, paternidade, adopción por acollemento ou tutela dun familiar durante o estado de alarma, sempre que concorran o resto de requisitos previstos para a prestación extraordinaria por cese de actividade previstos no artigo 17 do Real Decreto Lei 8/2020, de 17 de marzo.
¿Teñen dereito á subvención os traballadores autónomos que optasen por adscribirse á Mutualidad de Previsión Social que teña constituída o colexio profesional ao que pertenzan e que actúe como alternativa ao Réxime Especial da Seguridade Social dos Traballadores por Conta Propia ou Autónomos?
Si.
¿Para optar á subvención, é necesario que os traballadores autónomos se manteñan na situación de cesamento de actividade no momento de solicitar a subvención, ou que se mantiveron na devandita situación durante un determinado tempo?
Non. Abonda con que se acolleron á devandita situación e lles fose recoñecida durante o estado de alarma, calquera que fose a duración concreta do período en que se mantiveron na devandita situación de cesamento.
¿Que contía ten a subvención?
600 euros.
¿É necesario xustificar posteriormente o destino dado aos fondos?
Non. A subvención non necesita xustificarse, podendo ser destinada aos gastos que o beneficiario considere oportunos.
¿Que implica o sometemento ao control financeiro dos beneficiarios?
Aínda que non sexa necesaria a xustificación, e do mesmo xeito que sucede en calquera subvención pública, a Intervención da Deputación Provincial poderá realizar controis financeiros conforme co previsto nas bases reguladoras (BOP de 12 de maio de 2020) e no Título III da Lei xeral de subvencións.
Os devanditos controis permitirán a comprobación documental do cumprimento dos requisitos para a obtención da subvención, estando o interesado obrigado a facilitar a realización dos ditos controis.
Se no procedemento de control financeiro se detectase o incumprimento dos devanditos requisitos por causa imputable ao interesado (por exemplo, por falsidade na documentación presentada coa solicitude) a Deputación Provincial poderá exercer as accións legais correspondentes para o reintegro das subvencións e a imposición das sancións que procedan.
II. Instrucións para a formulación de solicitudes de subvencións para traballadores autónomos dos municipios de menos de 20.000 habitantes da provincia que se acollesen ao cesamento de actividade na crise do COVID 19.
¿Quen debe asinar a solicitude?
A solicitude debe asinarse pola persoa física solicitante ou polo seu representante, de forma electrónica (no caso de presentación telemática) ou manual (no caso de presentación en oficina de rexistro ou correos).
¿Que documentación se debe achegar?
Deben achegarse os seguintes documentos:
1º) Con carácter xeral:
a) Formulario normalizado de solicitude, debidamente cuberto, dispoñible: (descargar formulario)
b) Copia da resolución de recoñecemento da prestación extraordinaria por cesamento de actividade prevista no artigo 17 do Real decreto lei 8/2020 de 17 de marzo, de medidas urxentes extraordinarias para facerlle fronte ao impacto económico e social do COVID 19.
No caso dos autónomos que non puidesen acollerse á prestación extraordinaria por cese de actividade por atoparse en situación de incapacidade temporal ou baixa por maternidade, paternidade, adopción por acollemento ou tutela dun familiar, a presentación da resolución de recoñecemento da prestación extraordinaria por cese de actividade será substituída pola seguinte documentación:
i) Resolución de declaración ou recoñecemento da situación de baixa de que se trate ou xustificante da presentación da correspondente solicitude de baixa ante a mutua ou Tesourería Xeral da Seguridade Social
ii) No caso de que a actividade do autónomo non se vise suspendida polo Real Decreto 463/2020 de 14 de marzo, acreditación da redución da facturación cando menos nun 75 %, mediante calquera dos medios previstos no apartado 10 do artigo 17 do Real Decreto Lei 8/2020 de 17 de marzo.
c) Certificación actualizada de situación censal, expedida con posterioridade ao 31 de decembro de 2019 pola Axencia Estatal Tributaria ou polo concello onde se exerza a actividade, na que se indique a actividade económica exercida e o domicilio da actividade económica. A certificación censal será do propio autónomo como persoa física ou da persoa xurídica ou entidade sen personalidade xurídica a través da que se exerza a actividade e á que estea vinculado.
Non obstante o anterior, no suposto de actividades exercidas nos municipios de Avión, Baltar, Bande, Barbadás, Beariz, Os Blancos, Boborás, A Bola, O Bolo, Carballeda de Valdeorras, Castro Caldelas, Chandrexa de Queixa, Entrimo, Esgos, Xinzo de Limia, A Gudiña, O Irixo, Xunqueira de Ambía, Xunqueira de Espadanedo, Larouco, Laza, Lobeira, Lobios, A Mezquita, Montederramo, Muíños, Nogueira de Ramuín, Padrenda, Piñor, A Porqueira, A Pobra de Trives, Punxín, Rairiz de Veiga, San Xoán de Río, Riós, Rubiá, San Amaro, San Cristovo de Cea, Sandiás, Sarreaus, Taboadela, A Teixeira, Toén, Trasmiras, Viana do Bolo e Vilamartín de Valdeorras non será necesario que se achegue este documento, ao dispoñer a propia Deputación da información por ser a xestora do IAE nos ditos municipios.
d) Certificado de titularidade da conta corrente onde desexa que se realice o ingreso da subvención, expedido pola correspondente entidade de crédito. Non obstante o anterior, poderán obter igualmente a subvención os traballadores autónomos que non puideron acollerse ao cese extraordinario de actividade por atoparse en situación de incapacidade temporal ou baixa por maternidade, paternidade, adopción por acollemento ou tutela dun familiar durante o estado de alarma, sempre que concorran o resto de requisitos previstos para a prestación extraordinaria por cese de actividade previstos no artigo 17 do Real Decreto Lei 8/2020, de 17 de marzo.
2º) No caso de que a solicitude se formule a través de representante:
Copia do poder de representación do interesado.
3º) No caso de autónomos que exerzan a súa actividade a través de persoas xurídicas ou entidades sen personalidade xurídica:
Copia da escritura de constitución da persoa xurídica, debidamente actualizada e inscrita no rexistro oficial correspondente, ou ben copia do contrato ou título constitutivo da sociedade civil, comunidade de bens ou entidade sen personalidade xurídica de que se trate
4º) No caso de que o solicitante ou o seu representante se opoñan á consulta dos seus datos de identidade a través das plataformas de intermediación de datos das administracións públicas:
a) Escrito de oposición expresa á consulta dos seus datos de identidade ou os do representante a través das plataformas de intermediación electrónica das administracións públicas
b) Copia do DNI do solicitante e/ou do seu representante
¿Onde se pode presentar?
O formulario de solicitude e a documentación adxunta poden presentarse de dúas formas alternativas:
a) De forma telemática, a través do Rexistro Electrónico da Deputación Provincial de Ourense (sede.depourense.es)
b) De forma presencial, en calquera dos seguintes lugares:
- Nas oficinas de rexistro da Deputación Provincial de Ourense ou de calquera outra administración pública.
- Nas oficinas de correos.
¿Como debe presentarse a solicitude telemática?
Para a presentación telemática da solicitude, o solicitante debe dispor dun certificado electrónico cualificado de sinatura electrónica cualificada e avanzada ou de selo electrónico cualificado ou avanzado (o selo electrónico só será admisible no caso de que a solicitude se presente por unha persoa xurídica en representación da persoa física solicitante).
O solicitante deberá obter e cubrir debidamente o formulario normalizado dispoñible:Formulario Non é necesario asinar electrónicamente o documento, xa que a sinatura se emitirá ao realizar a presentación na sede.
A presentación realizarase a través da sede electrónica da Deputación de Ourense (sede.depourense.es) a través da que se accederá ao Rexistro Electrónico. No Rexistro Electrónico, deberase utilizar o trámite denominado “Solicitude de propósito xeral”.
Ao cumprir con este trámite, debe terse en conta o seguinte:
- Na opción “medios de notificación” debe escollerse obrigatoriamente a “notificación electrónica”
- No campo EXPÓN recoméndase incluír o seguinte texto: Traballador/a autónomo en cesamento de actividade durante o estado de alarma .
No campo SOLICITA recoméndase incluír o seguinte texto: Subvención COVID 19
¿Como debe presentarse a solicitude presencial?
O solicitante deberá obter e cubrir debidamente o formulario normalizado: descarga, así como na oficina de Rexistro Xeral da Deputación de Ourense.
Unha vez cuberto, deberá proceder a asinalo e entregalo na oficina de presentación, en unión da documentación adxunta correspondente.
¿Deben cubrirse todos os campos do formulario?
Todos os campos son obrigatorios, excepto os seguintes:
1) Os indicados no propio formulario como específicos para determinados supostos (por exemplo, poder do representante cando se actúe ao seu través) só serán obrigatorios nos devanditos supostos.
2) O teléfono móbil e o correo electrónico non son estritamente obrigatorios, pero é moi importante que se inclúan. En especial, é importante indicar un correo electrónico, xa que as notificacións no procedemento practicaranse de modo exclusivamente electrónico, enviándose o aviso de posta a disposición da notificación mediante e - mail (polo que, en caso de non facelo constar no formulario, non se remitirá o aviso por e - mail, sendo válida a notificación electrónica practicada en sede, que se entenderá realizada se o interesado non a abre nun prazo de dez días naturais desde a posta a disposición).
¿É necesario que os documentos que se presenten sexan orixinais ou copias compulsadas?
Non, non é necesario. Abonda con copia simple, xa sexa en papel (se se presenta de forma presencial) ou dixitalizada (se se presenta de forma telemática a través do Rexistro Electrónico)
¿O poder do representante debe facerse en escritura pública?
Non é necesario. Pode facerse en documento privado, sempre que figure claramente o nome, apelidos e DNI e as sinaturas de representante e representado e que o seu contido autorice ao representante a formular a solicitude en nome do representado.
¿En que prazo se debee presentar?
Do 12 de maio de 2020 ao 9 de xuño de 2020, ambos inclusive.
En caso de dúbidas ou necesidade de asistencia para a formulación da solicitude, poderán formularse consultas mediante correo electrónico dirixido a secretaria.xeral@depourense.es , indicando as cuestións sobre as que se formula consulta e un número de teléfono de contacto.
