Pablo Pérez: “o servizo de Vías e Obras funciona con axilidade e mesmo ten unha moi boa valoración entre alcaldes do PSOE”

“As brigadas de Vías de Obras da Deputación de Ourense teñen unha moi boa valoración entre os alcaldes da provincia, mesmo entre os rexedores socialistas”, afirma o deputado de Cooperación do grupo popular de goberno, Pablo Pérez, en resposta ás críticas do PSOE sobre este servizo. Pérez rexeita a demagoxía da oposición socialista á hora de falar dun departamento que se caracteriza pola súa axilidade, por facilitar as peticións de axuda a través de internet e por respectar unha rigorosa orde de chegada das solicitudes.
Unha vez máis, lamenta o deputado popular, “as aportacións dos socialistas son unha folla en branco, só cheas de críticas nas que queda en evidencia que non coñecen nin leron o plan Ourense 15-19, onde figuran perfectamente definidos todos os proxectos que o PP se comprometeu a executar, entre eles a revisión do modelo das brigadas de Vías e Obras”.
Pablo Pérez defende o papel esencial que xogan as brigadas de Vías e Obras no ámbito da cooperación cos concellos “polo que calquera cambio, pensando no futuro, require dunha análise profunda para presentar un novo modelo, previsto no plan para marzo de 2018”.
O deputado Pablo Pérez recomenda ao grupo socialista da oposición que antes de criticar a acción de goberno lea con detemento o plan Ourense 15-19 e así comprobe cales son as actuacións previstas e o seu calendario.
Unha vez máis, engade Pérez, o PSOE amosa unha notable carencia de iniciativa política, centrándose tan só na crítica gratuíta “e sempre para poñer sombras sobre a actividade dunha institución que logo demandan e defenden os seus propios alcaldes”.