Concello e Deputación asumirán o custe da estancia dos efectivos militares para os traballos de desinfección
- Un hotel da cidade aloxará 50 soldados da Brilat durante os tres días en que traballarán en residencias de maiores.
- As dúas administracións amosaron o compromiso e solidariedade coa cidadanía, que é o que nestes momentos máis importa, destacan o alcalde da cidade e o presidente da Deputación.
Ourense, 29 de abril de 2020.- O Concello de Ourense e a Deputación Provincial asumirán o custe da estancia e do aloxamento dos efectivos mlitares da Brilat, en total 50 soldados, que do 1 ao 3 de maio realizarán diferentes actuacións vinculadas aos traballos de desinfección de residencias e espazos de xeriatría, cos que se pretenden contribuír á posta en marcha de medidas de prevención pola COVID19.
As dúas administracións, que "teñen amosado o seu compromiso e solidariedade", en palabras do alcalde de Ourense, Gonzalo Pérez Jácome, asumirán o custe ao cincuenta por cento, gastos correspondentes ao pago do hotel Princess durante os tres días, por valor de 3.000 euros. O acordo coa xerencia do establecemento hoteleiro, que levou consigo contar coa correspondente autorización administrativa -o Real Decreto de situación de alarma obrígao a permanecer pechado- para acoller os soldados, que serán os únicos que permanecerán nesas instalacións, avanzouse tendo en conta o seu emprazamento, próximo á Comisaría da Policía Nacional, campo base para todos os vehículos que utilizarán para os desprazamentos e diferentes tarefas encomendadas.
Pola súa banda, o presidente da Deputación, Manuel Baltar, pon en valor a importancia da "colaboración institucional", neste caso co Concello de Ourense, para prestar un "importante servizo", así coma outro tipo de accións conxuntas que teñen como obxectivo "garantir a seguridade e a saúde das persoas, que é o que máis nos debe importar".
