A Deputación, a través do Inorde, impulsa a VI Xurés Bike Tour, cita clave do turismo deportivo no Parque Natural Baixa Limia – Serra do Xurés
A proba, que se celebrará os días 13 e 14 de xuño, reunirá a arredor de 150 deportistas de Galicia, do resto de España e do norte de Portugal
O presidente do Inorde, Rosendo Fernández, destaca que este tipo de eventos contribúen a promocionar os recursos naturais e patrimoniais da provincia e xeran un importante impacto económico no territorio
Lobeira, 09 de xuño de 2026.
A Deputación de Ourense, a través do Inorde e co apoio da Xunta de Galicia, impulsa a sexta edición da Xurés Bike Tour, unha proba de bicicleta de montaña consolidada xa como unha das citas deportivas e turísticas máis destacadas do calendario provincial. O evento desenvolverase os días 13 e 14 de xuño nos concellos de Bande e Muíños, con percorridos que tamén atravesan o municipio de Lobeira, no corazón do Parque Natural Baixa Limia-Serra do Xurés.
A presentación oficial da proba celebrouse hoxe no Miradoiro do Monte do Viso, en Lobeira, coa participación do presidente do Inorde, Rosendo Fernández; o delegado territorial da Xunta en Ourense, Manuel Pardo; representantes dos concellos implicados; a xerente do Inorde, Emma González; e o director técnico da competición, Serafín Martínez.
Durante a súa intervención, Rosendo Fernández subliñou que a Xurés Bike Tour exemplifica á perfección a aposta da Deputación e do Inorde polo turismo deportivo como ferramenta para dinamizar o territorio e poñer en valor os recursos naturais e patrimoniais da provincia. O presidente do Inorde destacou ademais que, ao tratarse dunha competición de dous días de duración, contribúe a atraer visitantes e acompañantes que xeran actividade económica nos establecementos hostaleiros e comerciais da comarca.
A competición contará con arredor de 150 deportistas procedentes de distintas provincias españolas e portuguesas. Os participantes poderán competir de forma individual ou por parellas, en equipos masculinos, femininos ou mixtos.
A Xurés Bike Tour desenvolverase en formato challenge, con dúas etapas puntuables. A primeira delas, a “Muíños Bike Marathon”, disputarase o sábado 13 de xuño con saída no Complexo Turístico-Deportivo do Corgo. Cun percorrido de 60 quilómetros e preto de 1.800 metros de desnivel acumulado, atravesará algúns dos espazos máis emblemáticos e espectaculares do Xurés, como o Alto de Picós, Salgueiro, Pitões das Júnias ou Xermade.
A segunda etapa, denominada “Bande Bike Marathon”, celebrarase o domingo 14 de xuño con saída en Bande e percorrido por diferentes puntos de interese paisaxístico e patrimonial da contorna, entre eles Taboazas, Nosa Señora do Viso, Corga do Porto e o Alto de Lebosandaus.
A través desta iniciativa, a Deputación de Ourense, a través do Inorde, continúa reforzando a súa estratexia de promoción do turismo activo e sostible, aproveitando o extraordinario potencial do territorio para atraer visitantes e xerar novas oportunidades de desenvolvemento económico no medio rural.
