Montse Lama: “mister casta é un mentirán ao afirmar que non existe ninguna causa xudicial aberta contra el”

A deputada popular, Montse Lama, manifestou hoxe ao remate do pleno da corporación provincial o seu asombro pola ousadía do voceiro socialista da Deputación á hora de afirmar que non ten ningunha causa xudicial aberta contra el. “Mister casta, porque ven a ser unha clase moi especial de representante público, é un mentirán sen ningún tipo de complexo, que é capaz de negar feitos coñecidos como unha demanda contra el en defensa dos dereitos fundamentais presentada por un traballador do Concello de Ribadavia, do que é alcalde”.
Os feitos denunciados constitúen “unha acusación moi grave contra un representante público, polo que ten que demitir dos seus cargos”, enfatizou a deputada, lembrando que o caso está agora no Tribunal Superior de Xustiza de Galicia á espera dunha resolución, “xa que están a impedir que se entren a xulgar os feitos alegando a prescipción da causa”.
“O voceiro socialista segue a dar mostras do seu xeito de facer política, que non é outro que o insulto e a falta de respecto nas súas intervencións, mesmo ameazando xa ao inicio do pleno de hoxe que non sería unha sesión tranquila”. Para a deputada popular, “esta actitude réstalle calquera tipo de credibilidade ás súas palabras, nas que nin por asomo escoitamos proposta algunha”.
Montse Lama advirte ao voceiro da oposición que, grazas á retransmisión dos plenos na web da Deputación, “os ourensáns teñen a oportunidade de comprobar obxectivamente a súa política destrutiva, valeira de iniciativas e que só ten como obxectivo poñer obstáculos a calquera proxecto que axude ao desenvolvemento da provincia”.