O presidente da Deputación analiza coa nova alcaldesa de Vilamartín os temas de máis interese para o municipio

O presidente da Deputación de Ourense, Manuel Baltar, recibiu no Pazo Provincial á nova alcaldesa de Vilamartín de Valdeorras, María Jesusa Candal, para analizar os asuntos de máis interese deste municipio valdeorrés. Entre os temas abordados na reunión figuraron a axilización do informe sectorial da Deputación de Ourense para o PXOM de Vilamartín de Valdeorras; a prestación de apoio en materia de novas tecnoloxías para a posta en marcha dunha páxina web do concello, e a solicitude de medios da Deputación de Ourense para levar a cabo o derrubamento dun edificio de propiedade municipal co obxectivo de mellorar o acceso ao núcleo de Arnado. Asemade, na xuntanza entre Baltar e Candal abordouse a situación da problemática viaria da estrada de San Vicente de Leira e analizouse a redacción do proxecto de restauración da ponte entre Córgomo e Portela para mellorar o acceso entre estas dúas poboacións.