Ourense CF entrega material contra incendios á Deputación para distribuír entre os GES e bombeiros
A doazón, realizada durante o encontro disputado hoxe no Couto, é froito da iniciativa do equipo ourensán e dos clubs Zamora CF, SD Ponferradina e Cultural e Deportiva Leonesa, que acordaron destinar o diñeiro recadado no torneo solidario, celebrado en setembro de 2025, para a adquisición do material de extinción
O deputado de Emerxencias, Plácido Álvarez, agradeceu a solidariedade do mundo do deporte, demostrando que cando “o lume ataca ao noso rural estamos todos no mesmo equipo”
Ourense, 10 de maio de 2026.
O Ourense CF entregou esta tarde á Deputación, durante o encontro disputado no Couto, un amplo equipamento de material contra incendios, froito dunha iniciativa do equipo ourensán e dos clubs Zamora CF, SD Ponferradina e Cultural y Deportiva Leonesa.
Os catro equipos disputaron en setembro do pasado ano, no estadio Reino de León, un torneo cuadrangular solidario cuxa recadación foi destinada á adquisición do material de extinción, logo da vaga de lumes do pasado verán.
O vicepresidente terceiro e deputado de Emerxencias, Plácido Álvarez, e o xefe da Sección de Emerxencias da Deputación, José Ramón Sánchez, foron os encargados de recoller o material doado para a provincia de Ourense, consistente en 60 unidades de batelumes, 50 mochilas de extinción e 19 caixas de máscaras e lentes protectores.
O equipamento destinarase aos Grupos de Emerxencias Supramunicipal (GES) da provincia e tamén aos bombeiros que a Deputación ten no Polígono de San Cibrao das Viñas. Deste modo, este material pasará a formar parte dos grupos de Celanova, Lobios, Muíños, Avión, Valdeorras, Maceda, A Gudiña, Castro Caldelas, Laza, Ribadavia, Pereiro de Aguiar, A Veiga e os bombeiros da Deputación.
O deputado de Emerxencias agradeceu a solidariedade do mundo do deporte, demostrando que cando “o lume ataca ao noso rural estamos todos no mesmo equipo”.
Álvarez afirmou que todo este material contribuirá a que os concellos ourensáns dispoñan de máis medios ante posibles incendios forestais”, agradecendo en nome de toda a cidadanía ourensá este xesto de apoio e compromiso que “demostra que somos un pobo que sempre está unido nos momentos difíciles”.
