Subvencions-Covid19-pequenas-empresas
I. Información xeral sobre as subvencións a pequenas empresas afectadas polo COVID 19:
¿Quen pode obter a subvención?
As persoas físicas ou xurídicas ou as entidades sen personalidade xurídica que cumpran os seguintes requisitos:
a) Exercer unha actividade económica nun municipio de menos de 20.000 habitantes da provincia de Ourense, figurando dada de alta no Imposto de Actividades Económicas.
Entenderase que a actividade se exerce nun municipio determinado cando o domicilio da actividade estea situado no devandito termo municipal. Considerarase como domicilio da actividade económica o que figure na matrícula do Imposto de Actividades Económicas.
b) Tratarse de pequenas empresas que cumpran de forma conxunta os seguintes dous requisitos:
i) Ter un número de traballadores inferior a dez persoas a data 14 de marzo de 2020.
ii) Ter, no exercicio 2019, unha facturación anual a efectos do IVE inferior a un millón de euros.
c) Que a actividade económica realizada non se vise afectada polo peche obrigatorio durante o estado de alarma declarado como consecuencia da pandemia do COVID - 19.
Para estes efectos, non se terá en conta como situación de peche obrigatorio o período comprendido entre o 30 de marzo e o 9 de abril de 2020 (no que, conforme co Real decreto lei 10/2020 de 29 de marzo, foron obxecto de paralización todas as actividades consideradas como non esenciais na devandita norma.
d) Que a súa facturación a efectos do IVE durante o período do 14 de marzo ao 30 de abril de 2020 se vise reducida nun 50 % ou máis con respecto á facturación media de 2019. A acreditación deste requisito realizarase mediante a comparación entre a facturación a efectos de IVE realizada en 2019 declarada (modelo 390) ante a Axencia Estatal Tributaria, dividida entre 12 e multiplicada por 1,5, e a facturación correspondente ao período entre o 14 de marzo e o 30 de abril de 2020 resultante do libro rexistro de facturas emitidas da empresa solicitante.
¿Que contía ten a subvención?
A contía non está determinada inicialmente. Será igual para todos os solicitantes, e fixarase unha vez concluído o proceso de presentación de solicitudes, dividindo o crédito total dispoñible (550.000 euros) entre o número de solicitudes con dereito a subvención. ¿É necesario xustificar posteriormente o destino dado aos fondos?
Non. A subvención non necesita xustificarse nin está suxeita ao cumprimento de ningunha condición, tendo como obxecto a colaboración, podendo ser destinada aos gastos que o beneficiario considere oportunos.
¿Que implica o sometemento ao control financeiro dos beneficiarios?
Aínda que non sexa necesaria a xustificación, e do mesmo xeito que sucede en calquera subvención pública, a Intervención da Deputación Provincial poderá realizar controis financeiros conforme co previsto nas bases reguladoras (BOP do 12 de maio de 2020) e no Título III da Lei xeral de subvencións.
Os devanditos controis permitirán a comprobación documental do cumprimento dos requisitos para a obtención da subvención, estando o interesado obrigado a facilitar a realización dos devanditos controis.
Se no procedemento de control financeiro se detectase o incumprimento dos ditos requisitos por causa imputable ao interesado (por exemplo, por falsidade na documentación presentada coa solicitude) a Deputación Provincial poderá exercer as accións legais correspondentes para o reintegro das subvencións e a imposición das sancións que procedan.
II. Instrucións para a formulación de solicitudes de subvencións para pequenas empresas afectadas polo COVID 19:
¿Quen debe asinar a solicitude?
A solicitude debe asinarse pola persoa física ou xurídica ou pola entidade solicitante, ou polo seu representante, de forma electrónica (no caso de presentación telemática) ou manual (no caso de presentación en oficina de rexistro ou correos).
¿Que documentación se debe achegar?
Deben achegarse os seguintes documentos:
1º) Con carácter xeral:
Certificación actualizada de situación censal, expedida con posterioridade ao 31 de decembro de 2019 pola Axencia Estatal Tributaria ou polo concello onde se exerza a actividade, na que se indique a actividade económica exercida e o domicilio da actividade económica.
Non obstante o anterior, no suposto de actividades exercidas nos municipios de Avión, Baltar, Bande, Barbadás, Beariz, Os Blancos, Boborás, A Bola, O Bolo, Carballeda de Valdeorras, Castro Caldelas, Chandrexa de Queixa, Entrimo, Esgos, Xinzo de Limia, A Gudiña, O Irixo, Xunqueira de Ambía, Xunqueira de Espadanedo, Larouco, Laza, Lobeira, Lobios, A Mezquita, Montederramo, Muíños, Nogueira de Ramuín, Padrenda, Piñor, A Porqueira, A Pobra de Trives, Punxín, Rairiz de Veiga, San Xoán de Río, Riós, Rubiá, San Amaro, San Cristovo de Cea, Sandiás, Sarreaus, Taboadela, A Teixeira, Toén, Trasmiras, Viana do Bolo e Vilamartín de Valdeorras non será necesario que se achegue este documento, ao dispoñer a propia Deputación da información por ser a xestora do IAE nos ditos municipios.
Copia do documento RLC (Relación de liquidación de cotizacións) correspondente ao mes de marzo de 2020 ou, se é o caso, documento TC1 do mesmo período.
Copia do modelo 390 presentado ante a Axencia Estatal Tributaria, no que se recolla o resumo anual da facturación por IVE correspondente a 2019. Se o solicitante non estivese obrigado á presentación do modelo 390, presentarase unha certificación ou informe da Axencia Estatal Tributaria no que conste o resumo da facturación anual por IVE de 2019.
Copia do libro rexistro de facturas emitidas polo solicitante no período do 14 de marzo ao 30 de abril de 2020.
Certificado de titularidade da conta corrente onde desexa que se realice o ingreso da subvención, expedido pola correspondente entidade de crédito.
2º) Se o solicitante é persoa xurídica ou entidade sen personalidade xurídica, deberá presentar, ademais:
Copia da escritura de constitución da persoa xurídica, debidamente actualizada e inscrita no rexistro oficial correspondente, ou ben copia do contrato ou título constitutivo da sociedade civil, comunidade de bens ou entidade sen personalidade xurídica de que se trate.
3º) Se a solicitude se formulase a través de representante:
Copia do poder de representación do interesado.
4º) Se o solicitante se opón á consulta dos seus datos de identidade a través da plataforma de intermediación de datos das administracións públicas, ademais:
Escrito de oposición expresa á consulta dos seus datos de identidade ou os do representante a través das plataformas de intermediación electrónica das administracións públicas
Copia do DNI/CIF do solicitante e o seu representante.
¿Onde se pode presentar?
O formulario de solicitude e a documentación adxunta poden presentarse de dúas formas alternativas:
a) De forma telemática, a través do Rexistro Electrónico da Deputación Provincial de Ourense (sede.depourense.es)
b) De forma presencial, en calquera dos seguintes lugares:
- Nas oficinas de Rexistro da Deputación Provincial de Ourense ou de calquera outra administración pública.
- Nas oficinas de correos.
¿Como debe presentarse a solicitude telemática?
Para a presentación telemática da solicitude, o solicitante debe dispor dun certificado electrónico cualificado de sinatura electrónica cualificada e avanzada ou de selo electrónico cualificado ou avanzado.
O solicitante deberá obter e cubrir debidamente o formulario normalizado dispoñible dende este enlace. Non é necesario asinar electrónicamente o documento, xa que a sinatura se emitirá ao realizar a presentación na sede.
A presentación realizarase a través da sede electrónica da Deputación de Ourense (sede.depourense.es) a través da que se accederá ao Rexistro Electrónico. No Rexistro Electrónico, deberase utilizar o trámite denominado “Solicitude de propósito xeral”.
Ao cumprir con este trámite, debe terse en conta o seguinte:
- No campo EXPÓN recoméndase incluír o seguinte texto: Pequena empresa afectada polo estado de alarma.
No campo SOLICITA recoméndase incluír o seguinte texto: Subvención COVID 19
¿Como debe presentarse a solicitude presencial?
O solicitante deberá obter e cubrir debidamente o formulario normalizado dispoñible: (descargar formulario), así como na oficina de Rexistro Xeral da Deputación de Ourense.
Unha vez cuberto, deberá proceder a asinalo e entregalo na oficina de presentación, en unión da documentación adxunta correspondente.
¿Deben cubrirse todos os campos do formulario?
Todos os campos son obrigatorios, excepto os seguintes:
1) Os indicados no propio formulario como específicos para determinados supostos (por exemplo, poder do representante cando se actúe ao seu través) só serán obrigatorios nos devanditos supostos.
2) O teléfono móbil e o correo electrónico non son estritamente obrigatorios, pero é moi importante que se inclúan. Advírtese neste sentido que todas as notificacións que se practiquen no procedemento realizaranse exclusivamente mediante anuncios publicados na sede electrónica, enviándose un aviso de publicación mediante e - mail ou, na súa falta, SMS (polo que, en caso de non facelo constar no formulario, non se poderá remitir o dito aviso).
¿É necesario que os documentos que se presenten sexan orixinais ou copias compulsadas?
Non, non é necesario. Basta con copia simple, xa sexa en papel (se se presenta de forma presencial) ou dixitalizada (se se presenta de forma telemática a través do Rexistro Electrónico)
¿O poder do representante debe facerse en escritura pública?
Non é necesario. Pode facerse en documento privado, sempre que figure claramente o nome e apelidos (ou razón social) e DNI ou CIF e as sinaturas de representante e representado e que o seu contido autorice ao representante a formular a solicitude en nome do representado.
¿En que prazo se debe presentar?
Do 12 de maio de 2020 ao 9 de xuño de 2020, ambos inclusive.
En caso de dúbidas ou necesidade de asistencia para a formulación da solicitude, poderán formularse consultas mediante correo electrónico dirixido a secretaria.xeral@depourense.es , indicando as cuestións sobre as que se formula consulta e un número de teléfono de contacto.
